Indorda iflos suv ichketish keltirib chiqardi, 10 kishi vafot etdi

Hindistonning Indor shahrida iflos ichimlik suvi tufayli ichketish kasalligi keng tarqaldi. Bu haqda Zamin.uz xabar berdi.

Ushbu holat oqibatida kamida 10 kishi hayotdan ko‘z yumdi, mingdan ortiq fuqaro esa tibbiy yordamga murojaat qildi. E’tiborlisi, Indor shahri ilgari Hindistonning “eng toza shahri” sifatida tan olingan edi.

Rasmiy ma’lumotlarga ko‘ra, kasallik dekabr oyining oxirlarida Bagiratpura tumanida aniqlangan. Mahalliy aholi qayt qilish va ichketish alomatlari bilan shifoxonalarga murojaat qila boshlagan.

Shahar hokimiyati o‘limlar soni bo‘yicha aniq ma’lumotni hali e’lon qilmagan bo‘lsa-da, tekshiruvlar davom etmoqda. Tekshiruvlar natijasida ichimlik suvi quvurlarida yoriqlar borligi aniqlangan.

Bu yoriqlar tufayli suv ifloslangan va tarkibida zararli bakteriyalar paydo bo‘lgan. Shuningdek, quvurlar joylashgan hududda sanitariya qoidalariga rioya qilinmagani ma’lum bo‘ldi.

Hozirda shahar shifoxonalarida yuzlab bemorlar davolanishni davom ettirmoqda, ayrim bemorlarning ahvoli og‘ir. Mutasaddilar aholiga faqat toza va xavfsiz suvdan foydalanishni tavsiya etmoqda.

Shu bilan birga, hududni qo‘shimcha toza suv bilan ta’minlash va muammoni bartaraf etish bo‘yicha zarur choralar ko‘rilmoqda.