Denis Kapustin o‘limi sahnalashtirildi, hayoti saqlandi
Ukraina Mudofaa vazirligi Bosh razvedka boshqarmasi (GUR) 2-yanvar kuni Denis Kapustinning o‘limi sahnalashtirilgani haqida videoyozuvni e’lon qildi. Bu haqda Zamin.uz xabar berdi.
Denis Kapustin Rossiyadagi "Rus ko‘ngillilar korpusi" (RKK) rahbarlaridan biri sifatida tanilgan. GURning ma’lum qilishicha, ushbu operatsiya Kapustinning hayotini saqlab qolish va Rossiya maxsus xizmatlari agentlarini aniqlash maqsadida amalga oshirilgan.
Operatsiya davomida dronlardan foydalangan holda maxsus videoyozuvlar tayyorlangan. Birinchi dron Kapustin bo‘lgan mikroavtobusga zarba bergan, ikkinchisi esa yong‘in oqibatlarini tasvirga olgan.
Mazkur videolar Rossiya maxsus xizmatlari buyurtmachilariga yuborilgan. GUR ma’lumotlariga ko‘ra, Rossiya tomon Kapustinni yo‘q qilish uchun yarim million dollar mukofot taklif qilgan.
Avvalroq, 27-dekabr kuni RKK Telegram-kanalida Kapustin Ukrainada, Zaporijjya viloyatida dron hujumi oqibatida halok bo‘lgani haqida xabar tarqalgan edi. Biroq, 1-yanvar kuni GUR uning o‘limi sahnalashtirilganini va maxsus operatsiya natijasida Kapustinning hayoti saqlab qolinganini ma’lum qildi.
Rossiya Ichki ishlar vazirligi GURning ushbu bayonotidan so‘ng Kapustinga yana qidiruv e’lon qilgan. RKK Telegram-kanali xabariga ko‘ra, bu haqda Rossiya Ichki ishlar vazirligi saytida ma’lumotlar paydo bo‘lgan.
Denis Kapustin Moskvada tug‘ilgan, keyinchalik ota-onasi bilan Germaniyaga ko‘chib ketgan. U Kyolnda yashagan va futbol ishqibozlari orasida tanilgan.
Shuningdek, "White Rex" sport kiyimlari brendini yaratgan, bu brendda natsistik ramzlarga ishora qiluvchi belgilar mavjud bo‘lgan. Germaniya hukumati 2019-yilda uning mamlakatdagi yashash huquqini bekor qilgan va Shengen hududiga kirishini taqiqlagan.
Rossiyaning Ukrainaga keng ko‘lamli hujumi boshlanganidan keyin Kapustin Ukrainaga ko‘chgan va 2022-yilda "Rus ko‘ngillilar korpusi"ni tashkil qilgan. Uning ta’kidlashicha, korpus tarkibida etnik ruslar bor bo‘lib, ular Ukrainadagi hududiy yaxlitlikni tiklash va Rossiya rejimiga qarshi kurashni maqsad qilgan.
