Ozada Rahmon Moskva fojiasi qurbonining oilasiga yordam berdi
Tojikiston prezidenti Imomali Rahmonning qizi Ozoda Rahmon Moskvada yuz bergan fojiali voqea ortidan 10 yoshli Qobiljon Aliyevning onasi Nilufar Safoyevaga moddiy yordam ko‘rsatdi. Bu haqda Zamin.uz xabar berdi.
Ozoda Rahmon tomonidan 30 ming AQSH dollariga teng bo‘lgan 300 ming somoniy miqdorida mablag‘ ajratilgani haqida Tojikistonning "Xovar" davlat axborot agentligi xabar berdi. Mazkur yordam jamiyatda birdamlik, insoniy qadriyatlar va mehr-oqibatni namoyon qilish maqsadida amalga oshirilgani ta’kidlanmoqda.
Shuningdek, Tojikiston hukumati Qobiljonning oilasiga uy sovg‘a qilgan. Bundan tashqari, tadbirkor Umar Alimatov Nilufar Safoyevani oyiga 10 ming somoniy maosh bilan ish bilan ta’minlashga va’da bergan.
Eslatib o‘tamiz, 16 dekabr kuni Moskva viloyatidagi maktabda sodir bo‘lgan hujumda 10 yoshli o‘quvchi Qobiljon Aliyev halok bo‘lgan edi. Ushbu voqea jamoatchilikda keng norozilikni keltirib chiqardi.
Tojikiston va Rossiya rasmiylari mazkur hodisani keskin qoralab, aybdorlarning qonun oldida javob berishini talab qilishdi. Mazkur yordam Tojikiston jamiyatining insonparvarlik qadriyatlariga sodiqligini hamda yordam va birdamlikni targ‘ib etuvchi yuksak maqsadlarini yana bir bor namoyon qiladi.
