Kim Chen Inning qizi Shimoliy Koreya vorisi bo‘ladimi?
Shimoliy Koreya yetakchisi Kim Chen Inning qizi Chju E kelajakda davlat rahbari lavozimiga voris bo‘lishi mumkinligi haqida taxminlar paydo bo‘lmoqda. Bu haqda Zamin.uz xabar berdi.
U yaqinda ota-onasi bilan birga Pxenyandagi Kumsusan quyosh maqbarasiga tashrif buyurib, mamlakatning avvalgi rahbarlari xotirasiga hurmat bajo keltirdi. Kuzatuvchilar Chju Ening ushbu rasmiy marosimda ishtirok etishini uning siyosiy hayotdagi o‘rni mustahkamlanayotganidan dalolat sifatida baholamoqda.
Bu holat uni otasining ehtimoliy vorisi sifatida tayyorlanayotganiga oid taxminlarni kuchaytirdi. So‘nggi yillarda Chju E davlat ommaviy axborot vositalarida tez-tez ko‘rina boshladi.
Bu esa tahlilchilar va Janubiy Koreya razvedka agentligi tomonidan Shimoliy Koreyada to‘rtinchi avlod rahbari aynan u bo‘lishi mumkinligi haqidagi fikrlarni kuchaytirdi. Shu tariqa, Chju E mamlakat siyosiy sahnasida muhim o‘rin egallashga tayyorlanayotgani haqida xulosalar qilinmoqda.
