Tramp: Maduro noqonuniy diktator, davri tugadi
AQSh prezidenti Donald Tramp Venesuela prezidenti Nikolas Maduro va uning hokimiyatini ag‘darish bilan bog‘liq operatsiya borasida matbuot anjumani o‘tkazdi. Bu haqda Zamin.uz xabar berdi.
U o‘z chiqishida Maduroni Venesuela xalqini yomon boshqarganlikda va narkotrafik faoliyatida ishtirok etganlikda aybladi. Trampning so‘zlariga ko‘ra, Nikolas Maduro noqonuniy diktator bo‘lib, nafaqat Venesuela, balki AQSh manfaatlariga ham zarar yetkazgan.
U Maduroni "Cartel de los Soles" deb nomlangan narkotik karteliga rahbarlik qilganlikda va minglab amerikaliklarning hayotiga zomin bo‘lganlikda aybladi. “Maduro hokimiyati yakunlandi, u endi prezident emas”, — dedi Tramp.
Shuningdek, AQSh prezidenti Venesuela neft sanoatiga katta e’tibor qaratilishini ta’kidladi. U yerdagi neft infratuzilmasini tiklash va rivojlantirish uchun yirik kompaniyalar milliardlab dollar sarmoya kiritishini aytib o‘tdi.
Trampning fikricha, bu jarayon Venesuela xalqini boy va farovon hayotga olib keladi. “Biz Venesuela xalqini baxtli qilamiz”, — dedi u.
Mazkur bayonotlar AQSh va Venesuela o‘rtasidagi munosabatlarda yangi burilish bo‘lishidan dalolat beradi. Bu esa Venesuelaning kelajakdagi siyosiy va iqtisodiy yo‘nalishlari aniq belgilanishiga xizmat qilishi mumkin.
