AQSh maxsus kuchlari Nikolas Maduroni qo‘lga oldi
AQSh shtab boshliqlari birlashgan qo‘mitasi raisi general Den Keyn prezident Donald Tramp bilan birgalikda o‘tkazilgan matbuot anjumanida Venesuela prezidenti Nikolas Maduroni qo‘lga olish operatsiyasi haqida ma’lumot berdi. Bu haqda Zamin.uz xabar berdi.
Ushbu operatsiya 2 yanvardan 3 yanvarga o‘tar kechasi amalga oshirilgani haqida xabar berildi. Den Keynning so‘zlariga ko‘ra, bu amaliyotga tayyorgarlik bir oy avval boshlangan.
Avval razvedka xizmatlari tomonidan Maduroning yashash joyi, odatlari va xavfsizlik choralari haqida ma’lumotlar to‘plangan. Sun’iy yo‘ldosh va dronlar orqali olingan ma’lumotlar Venesueladagi ichki manbalardan olingan ma’lumotlar bilan birlashtirilgan.
Olingan ma’lumotlar asosida Maduroning qarorgohi nusxasi qurilib, qo‘lga olish bo‘yicha mashg‘ulotlar o‘tkazilgan. Operatsiyaning boshlanishi ob-havo sharoitlari sabab biroz kechiktirilgan.
3 yanvarga o‘tar kechasi osmon bulut bilan qoplangach, Trampning shaxsiy buyrug‘i bilan amaliyot boshlandi. 20 ta harbiy baza va aviatashuvchilardan 150 dan ortiq harbiy samolyot, jumladan, F-35 qiruvchilari va B-1 bombardimonchilari havoga ko‘tarildi.
Shuningdek, maxsus kuchlar vertolyotlar orqali Karakas tomon yo‘l oldi. Vertolyotlar Karakasga yaqinlashganda Venesuela havo mudofaa tizimlari zararsizlantirildi.
Qo‘lga olish guruhi Maduroning qarorgohiga bostirib kirdi. Maxsus kuchlar Maduro va uning rafiqasi Siliya Floresni ularning yotoqxonasida uyquda bo‘lganida qo‘lga olishdi.
Operatsiya davomida otishma yuz berdi, ammo amerikalik harbiylar orasida yo‘qotishlar kuzatilmadi. Qo‘lga olinganlar vertolyot orqali AQSh harbiy kemasiga yetkazildi.
Tramp Maduro va Floresning Guantanamodagi bazadan Nyu-Yorkka olib kelinganini tasdiqladi. Ular ustidan sud jarayoni Nyu-Yorkda o‘tkaziladi.
AQSh bosh prokurori Pem Bondining ma’lumotiga ko‘ra, Nikolas Maduro narkoterrorizm, kokain kontrabandasi va qurol saqlashda ayblanmoqda. Tramp ushbu operatsiyani muvaffaqiyatli deb e’lon qilib, Venesuela iqtisodiy infratuzilmasini tiklash uchun AQShning sarmoya kiritishini ta’kidladi.
Shuningdek, u Venesuela xalqi farovon va mustaqil bo‘lishi uchun barcha zarur choralar ko‘rilishini aytdi.
