Tramp: Maduro qo‘lga olindi, AQShga olib kelindi
AQSh Prezidenti Donald Tramp Venesuela rahbari Nikolas Maduroning maxsus harbiy operatsiya natijasida qo‘lga olinganini va AQShga olib kelinganini e’lon qildi. Bu haqda Zamin.uz xabar berdi.
U hozirda Nyu-York shahrida hibsda saqlanmoqda. Maduroga qarshi giyohvand moddalar savdosi bilan bog‘liq ayblovlar qo‘yilgan.
Trampning ta’kidlashicha, bu harakat Venesueladagi siyosiy inqirozni bartaraf etish maqsadida amalga oshirilgan. Prezident Tramp AQSh Venesuelani xavfsiz siyosiy o‘tish davrigacha vaqtinchalik boshqarishini bildirdi.
Unga ko‘ra, mamlakatdagi neft sanoati tiklanadi va iqtisodiy barqarorlikni ta’minlash ustida ish olib boriladi. Shuningdek, AQSh zarur bo‘lsa, Venesuelada harbiy kuch saqlashdan cho‘chimaydi.
Venesuelada esa Maduroning tarafdorlari uning hibsga olinishi noqonuniy ekanini ta’kidlamoqda. Ular AQShni mamlakat suverenitetini buzishda ayblashmoqda.
Shu bilan birga, Venesuela aholisi orasida noaniqlik kuchayib, ayrim hududlarda xavfsizlik choralari kuchaytirilgan. Vaqtinchalik boshqaruv masalasi hanuz bahsli bo‘lib qolmoqda.
Xalqaro hamjamiyat bu voqeaga turli munosabat bildirmoqda. BMT va ayrim davlatlar xalqaro huquqqa rioya qilish zarurligini eslatdi.
Venesueladagi vaziyat yaqin kunlarda mintaqaviy va global siyosatda muhim muhokama mavzusiga aylanishi kutilmoqda.
