Krishtianu Ronaldu Portugaliyadagi 30 mln yevrolik uyiga ko‘chmoqda
Krishtianu Ronaldu Portugaliyada joylashgan hashamatli uyiga ko‘chib o‘tishga tayyorlanmoqda. Bu haqda Zamin.uz xabar berdi.
Ushbu uyning qurilishi yaqinda yakunlanib, uning qiymati 30 million yevrodan yuqori baholanmoqda. Mazkur rezidensiya mamlakatdagi eng katta va qimmat uylar qatoriga kiradi.
Uy Portugaliyaning qirg‘oq hududida, shahardan 48 kilometr uzoqlikda joylashgan bo‘lib, unda Ronalduning qimmatbaho avtomobillar kolleksiyasi uchun yer osti avtoparki ham mavjud. Uyning qurilishi uch yil davom etgan va unda barcha zamonaviy qulayliklar yaratilgan.
Uyning tarkibida 8 ta yotoqxona, katta shisha basseyn, yer osti suv yo‘lagi, aqlli isitish tizimi, sport zali, yopiq va ochiq basseynlar, massaj xonasi hamda kinozal mavjud. Ayniqsa, Ronaldu va uning oilasi uchun maxsus sharoitlar yaratilgan.
Farzandlari uchun o‘yin maydonchasi, Ronaldu va uning turmush o‘rtog‘i Jorjinya Rodrigez uchun esa shaxsiy plyaj tashkil etilgan. Uy interyerida qimmatbaho materiallardan foydalanilgan.
Masalan, oltin kranlar, italyancha marmar va maxsus buyurtma asosida tayyorlangan Louis Vuitton freskasi o‘rnatilgan. Shuningdek, futbolchi uy yaqinidagi golf maydonini sotib olishga harakat qilgan, ammo bu taklif rad etilgan.
Mazkur hashamatli uy Ronaldu va uning oilasi uchun qulay hayot tarzini ta’minlashga mo‘ljallangan bo‘lib, futbolchining moliyaviy imkoniyatlari va oilasiga bo‘lgan e’tiborini yana bir bor namoyish etadi.
