Rio-de-Janeyroda 2,5 mln odam Yangi yilni nishonladi

Rio-de-Janeyroda dunyodagi eng katta Yangi yil bayrami bo‘lib o‘tdi. Bu haqda Zamin.uz xabar berdi.

Bu tadbir Ginnesning rekordlar kitobi tomonidan dunyodagi eng yirik Yangi yil bayrami sifatida qayd etildi. UPI xabariga ko‘ra, Kopakabana plyajida 2026 yilning boshlanishi munosabati bilan 2,5 millionga yaqin odam yig‘ildi.

Ushbu ko‘lamli tadbir faqat ishtirokchilar soni bilan emas, balki uning madaniy ahamiyati va o‘yin-kulgining yuqori sifati bilan ham e’tirof etildi. Bayram davomida plyajda uchta katta sahna o‘rnatildi.

Tashkilotchilar tomonidan 12 daqiqalik mushakbozlik namoyishi uchun 19 ta suzuvchi platforma ishga tushirildi. Shuningdek, 1200 ta dron ishtirokida maxsus shou ham o‘tkazildi.

Shahar ma’muriyati ma’lumotiga ko‘ra, 2,5 million odam faqat Kopakabana plyajida yig‘ilganlarning sonini anglatadi. Rio-de-Janeyroning boshqa hududlarida o‘tkazilgan tadbirlar bilan birga hisoblansa, Yangi yil bayramlarida jami besh millionga yaqin odam ishtirok etgan.

Bu ko‘lamli tadbir nafaqat Rio-de-Janeyro, balki butun dunyo uchun muhim voqea sifatida tarixga kirdi.