Nikolas Maduro AQShda qo‘lga olindi
AQSh ommaviy axborot vositalarida e’lon qilingan foto va videolarda Venesuela prezidenti Nikolas Maduro va uning rafiqasi Siliya Floresning Qo‘shma Shtatlarga olib kelingan lahzalari aks etgani ta’kidlanmoqda. Bu haqda Zamin.uz xabar berdi.
Xabarlarga ko‘ra, Maduro Karib dengizida joylashgan AQSh aviatashuvchisidan harbiy samolyotda Nyu-Yorkka olib kelingan. Bu haqda "Kursiv.uz" xabar berdi.
Kadrlar tasvirida Maduro Nyu-Yorkdagi harbiy bazada samolyotdan tushirilayotgani ko‘rsatilgan. Unda prezidentning qo‘llarida kishan, oyoqlarida zanjirlar borligi va boshiga kapyushon yopilgani qayd etilgan.
Uni AQSh kuch tuzilmalari xodimlari kuzatib borgan. Ma’lumotlarga ko‘ra, qo‘nishdan so‘ng Maduro va uning rafiqasi vertolyotga o‘tkazilib, Manhettendagi Narkotik moddalarga qarshi kurash boshqarmasi (DEA) binosiga olib borilgan.
Jurnalistlarga qisqa muloqot chog‘ida Maduro “Xayrli tun va Yangi yil bilan” deb aytgan. Shuningdek, ijtimoiy tarmoqlarda Fox News telekanalida namoyish etilgani aytilayotgan videolar ham tarqaldi.
Ularda Maduroning idoraga olib kirilayotgani ko‘rsatilgan. Avvalroq, u maxsus operatsiya davomida qo‘lga olingani va dastlab Karib dengizidagi “Ivodzima” nomli AQSh aviatashuvchisiga yetkazilgani haqida xabarlar chiqqandi.
OAV xabarlariga ko‘ra, AQSh tomoni Nikolas Madoruni narkotik moddalar kontrabandasi bilan bog‘liq ayblovlar asosida ta’qib qilmoqda. Sud jarayoni yaqin kunlarda boshlanishi kutilmoqda.
Hozircha esa Maduro Bruklindagi federal tergov izolyatorida saqlanishi rejalashtirilgan.
