Xitoy: “Hech bir davlat dunyo hakami emas”

Xitoy tashqi ishlar vaziri Van Yi AQShning Venesuela prezidenti Nikolas Maduroni qo‘lga olishi bilan bog‘liq harakatlariga munosabat bildirdi. Bu haqda Zamin.uz xabar berdi.

U hech bir davlat o‘zini “dunyo hakami” sifatida ko‘rsatmasligi kerakligini ta’kidladi. Van Yi bu fikrlarini Pokiston tashqi ishlar vaziri bilan uchrashuv chog‘ida ma’lum qildi.

Uning so‘zlariga ko‘ra, barcha davlatlarning suvereniteti va xavfsizligi xalqaro qoidalarga muvofiq hurmat qilinishi lozim. U Venesueladagi oxirgi voqealarni “kutilmagan holat” sifatida baholadi.

Hozirgi paytda Nikolas Maduro AQShda hibsda saqlanmoqda. Unga nisbatan giyohvand moddalar savdosiga aloqadorlikda ayblov qo‘yilgan bo‘lib, sud jarayoni yaqin kunlarda boshlanishi kutilmoqda.

AQSh prezidenti Donald Tramp Venesuela boshqaruvi vaqtinchalik AQSh nazoratida bo‘lishini bildirgan. Xitoy rasmiylari Maduroning hibsga olinishini salbiy holat sifatida baholamoqda.

Chunki so‘nggi yillarda Xitoy Venesuela bilan savdo aloqalarini faol davom ettirib kelmoqda. Xususan, 2024-yilda Xitoy Venesueladan katta miqdorda neft xarid qilgan.

Shu sababli, bu holat Xitoy uchun iqtisodiy va siyosiy jihatdan noqulaylik tug‘dirishi mumkin.