To‘qayev parlament islohotlari haqida da’volarni rad etdi
Qozog‘istonda parlament islohoti davom etmoqda. Bu haqda Zamin.uz xabar berdi.
Shu jarayonda ba’zi ekspertlar tomonidan parlament spikeri vakolatlarini kuchaytirish orqali prezident Qosim-Jo‘mart To‘qayev kelgusida o‘sha lavozimga o‘tishi uchun sharoit yaratilayotgani haqida taxminlar ilgari surildi. Ammo prezident bu kabi da’volarni rad etdi.
“Turkistan” gazetasining 2026 yil 5 yanvar sonida berilgan intervyusida To‘qayev bu fikrlarni asossiz deb atab, bunday taxminlar uning siyosiy tamoyillariga zid ekanini ta’kidladi. Uning so‘zlariga ko‘ra, Qozog‘iston prezidentlik boshqaruviga asoslangan davlat bo‘lib qoladi.
To‘qayevning aytishicha, u prezidentlikka kirishidan oldin ham “Kuchli prezident – nufuzli parlament – hisobdor hukumat” tamoyilini ilgari surgan. Davlat tizimini shaxsiy manfaat yo‘lida o‘zgartirish mas’uliyatsizlik bo‘lishini alohida qayd etgan.
Shuningdek, prezident barcha muhim islohotlar, jumladan, parlamentga oid o‘zgarishlar faqat umumxalq referendumi orqali qabul qilinishini ta’kidladi. U parlament islohotlari ortida “yashirin reja” izlashga asos yo‘qligini ham qayd etdi.
Rasmiy manbalarga ko‘ra, 2026 yil Qozog‘iston uchun yangi modernizatsiya bosqichi bo‘ladi. Bu yil “Raqamlashtirish va sun’iy intellekt yili” deb e’lon qilindi.
Shuningdek, Konstitutsiyaviy islohotlar ham muhim ahamiyat kasb etishi kutilmoqda.
