Brijit Makron sha’niga zarar yetkazganlar jazolandi
Parij jinoiy sudi Fransiya birinchi xonimi Brijit Makronga qarshi internetda tarqatilgan asossiz ma’lumotlar, haqorat va kamsituvchi fikrlar bo‘yicha hukm chiqardi. Bu haqda Zamin.uz xabar berdi.
Sud qaroriga ko‘ra, 10 nafar ayblanuvchi Brijit Makron sha’niga qasddan zarar yetkazgan deb topildi. Ularning aksariyati 4 oydan 8 oygacha shartli qamoq jazosiga hukm qilindi.
Shuningdek, ayblanuvchilardan biri sud majlisiga kelmaganligi sababli 6 oy qamoq jazosi olgan. Hukm qilinganlar orasida reklama agentligi rahbari Orelen Puarson va folbin sifatida tanilgan Amandin Rua ham bor.
Ular Brijit Makronga qarshi dezinformatsiya kampaniyasini tashkil qilganlikda ayblangan. Bundan tashqari, sud ularni internetdagi muloqot madaniyatini oshirishga yo‘naltirilgan maxsus kurslarda qatnashishga majbur qilgan.
Ayblanuvchilar tomonidan tarqatilgan mish-mishlarga ko‘ra, Brijit Makron “aslida erkak bo‘lib tug‘ilgan” degan asossiz va haqoratomuz iddaolar ilgari surilgan. Ular, shuningdek, Emmanuel va Brijit Makron o‘rtasidagi yosh farqini omma oldida masxara qilishga urinishgan.
Shuningdek, AQShda o‘ta o‘ng qarashlarga ega faol Kendis Ouens tomonidan Brijit Makron haqida shunga o‘xshash mish-mishlar tarqatilgani ma’lum qilindi. Bu bo‘yicha da’voni Emmanuel Makronning o‘zi qo‘zg‘atgan.
Sud jarayoni davom etmoqda.
