Tramp bayonoti AQSh neft kompaniyalari aksiyalarini oshirdi
Dushanba kuni AQShning yirik neft kompaniyalari aksiyalari narxi oshdi. Bu haqda Zamin.uz xabar berdi.
Bunga AQSh sobiq prezidenti Donald Trampning Venesuela neft zaxiralariga kirish imkoniyati yuzaga kelishi haqidagi bayonoti sabab bo‘ldi, deb xabar beradi Reuters. Trampning ta’kidlashicha, agar Venesuela rahbari qo‘lga olinsa, AQSh ushbu mamlakatdagi neft obyektlari ustidan nazorat o‘rnatishi mumkin.
U, shuningdek, amerikalik kompaniyalar bu yerga investitsiya kiritib, infratuzilmani tiklashi va keyinchalik daromad olishi mumkinligini aytib o‘tgan. Ma’lumki, Venesuela dunyodagi eng yirik neft zaxiralariga ega mamlakatlardan biri hisoblanadi.
Ammo so‘nggi yillarda noto‘g‘ri boshqaruv, investitsiyalar yetishmasligi va xalqaro sanksiyalar tufayli mamlakatdagi neft qazib olish hajmi sezilarli darajada kamaygan. Premarket savdolari davomida Venesuelada faoliyat yuritayotgan yagona yirik AQSh kompaniyasi — Chevron aksiyalari 7 foizga oshdi.
Shuningdek, Phillips 66, Marathon Petroleum, Valero Energy va PBF Energy kabi kompaniyalarning qimmatli qog‘ozlari ham 5-16 foiz oralig‘ida yuqoriladi. Shu bilan birga, xalqaro bozorda umumiy neft narxlari deyarli o‘zgarmadi.
Bunga jahon bozorida taklifning yuqori bo‘lib qolayotgani sabab bo‘lmoqda. Venesueladan neft yetkazib berish masalasi esa hanuz noaniqligicha qolmoqda.
Venesuela nefti tarkibida oltingugurt miqdori yuqori bo‘lganligi sababli, bu neft dizel va boshqa og‘ir mahsulotlar ishlab chiqarish uchun qulay xomashyo hisoblanadi. Ayniqsa, AQShning Meksika qo‘ltig‘i atrofidagi zavodlari bunday xomashyoni qayta ishlashga moslashtirilgan.
Reuters ma’lumotlariga ko‘ra, agar Venesuelada siyosiy va iqtisodiy o‘zgarishlar yuz bersa, birinchi navbatda Chevron bundan foyda ko‘rishi mumkin. AQShning neftni qayta ishlash korxonalari esa yaqin manbalardan og‘ir neft olish imkoniyatiga ega bo‘ladi.
