Suriya prezidenti haqida tarqalgan xabarlar rad etildi
Suriya Ichki ishlar vazirligi muvaqqat prezident Ahmad al-Sharaga qarshi suiqasd uyushtirilgani haqidagi ijtimoiy tarmoqlarda tarqalgan xabarlarni rasman rad etdi. Bu haqda Zamin.uz xabar berdi.
Vazirlik matbuot kotibi Nuriddin al-Baba bu xabarlar asossiz ekanini ta’kidladi. Unga ko‘ra, so‘nggi kunlarda mamlakat prezidenti yoki boshqa yuqori lavozimdagi amaldorlar bilan bog‘liq hech qanday favqulodda holat yuz bermagan.
Nuriddin al-Baba bu haqda o‘zining rasmiy ijtimoiy tarmoq sahifasida bayonot bergan. «Tarqalgan xabarlar mutlaqo yolg‘on va haqiqatga mos kelmaydi.
Yaqin kunlarda prezident yoki boshqa mansabdor shaxslarga qarshi hech qanday hujum yoki noxush hodisa sodir bo‘lmadi», — deb yozdi u. Shuningdek, Nuriddin al-Baba fuqarolarni va ommaviy axborot vositalarini mas’uliyat bilan ish tutishga chaqirdi.
U tekshirilmagan manbalarga ishonmaslikni va faqat davlat idoralari tomonidan taqdim etilayotgan rasmiy ma’lumotlarga tayanishni tavsiya qildi.
