Rossiyada oilaviy nizolar uchun mediatsiya majburiy bo‘ladi
Rossiyada oilaviy nizolarni hal qilishda majburiy mediatsiyani joriy etish masalasi ko‘rib chiqilmoqda. Bu haqda Zamin.uz xabar berdi.
Bu borada maxsus qonun loyihasini tayyorlash 2026-2027 yillarga mo‘ljallangan. Ushbu tashabbus "Vositachi ishtirokidagi nizolarni hal qilishning muqobil tartibi (mediatsiya tartib-taomili) to‘g‘risida"gi Federal qonunga o‘zgartirishlar kiritish orqali amalga oshirilishi rejalashtirilgan.
Mazkur tashabbus oila va demografik siyosatni rivojlantirish rejasining bir qismi sifatida ishlab chiqilmoqda. Rejaga muvofiq, ajrashayotgan ota-onalar kelishuvga erisholmagan taqdirda, kamida bir marta professional mediator bilan uchrashishlari majburiy bo‘ladi.
Mediator ishtirokida o‘tkaziladigan muzokaralar davrida sud jarayonlari to‘xtatilishi ham nazarda tutilmoqda. Shuningdek, oilaviy nizolar bilan shug‘ullanuvchi mediatorlarning alohida reyestrini shakllantirish rejalashtirilgan.
Ushbu o‘zgarishlar orqali oilaviy mojarolarni sudgacha hal qilishni osonlashtirish va nizolarni tartibga solishning samarali usulini joriy etish ko‘zda tutilgan.
