Tailandda folbin mijozining telefonini o‘g‘irladi
Tailandning Pattaya shahrida politsiya 38 yoshli folbin Udomsap Muangkayini o‘g‘irlikda ayblab qo‘lga oldi. Bu haqda Zamin.uz xabar berdi.
U o‘zining bashoratlari to‘g‘riligini isbotlash maqsadida mijozining telefonini o‘g‘irlagan. Ushbu holat haqida *South China Morning Post* nashri xabar berdi.
Hodisa Vat Chaymongkol ibodatxonasi yaqinida sodir bo‘lgan. Folbin yupun kiyingan holda ko‘rinish bergani uchun unga rahmi kelgan 19 yoshli Pim ismli qiz undan yangi yil uchun bashorat qilishni so‘ragan.
Udomsap seans davomida qizga kelgusi yilda omadsizlikka uchrashi va qimmatbaho buyumini yo‘qotishi haqida aytgan. Shuningdek, u bu ko‘ngilsizlikning oldini olish uchun pul taklif qilgan.
Biroq qiz pul bermaslikka qaror qilganida, folbin uning iPhone telefonini o‘g‘irlab ketgan. Qiz telefonining yo‘qolganini keyinroq sezib, folbinning oldiga qaytgan.
Udomsap aybini rad etgan bo‘lsa-da, o‘tkinchilarning yordamida qo‘lga olingan va politsiya chaqirilgan. Tekshiruv davomida telefon folbinning sumkasidan topilgan, u tibbiy niqoblar qutisiga yashirilgan edi.
Shuningdek, uning folbinlik bilan bog‘liq uskunalari ham musodara qilingan. Politsiya ma’lumotlariga ko‘ra, Udomsap o‘z aybini tan olib, moddiy ahvoli og‘irligini aytgan va jabrlanuvchidan ariza bermaslikni so‘ragan.
Telefon qizga qaytarilgan, folbin esa qo‘shimcha tekshiruv uchun politsiya bo‘limiga olib ketilgan.
