Yaponiyada 243 kilolik tunes 3,2 mln dollarga sotildi

Yaponiyada yangi yil an’anaviy tarzda baliq auksioni bilan boshlandi. Bu haqda Zamin.uz xabar berdi.

5-yanvar kuni o‘tkazilgan navbatdagi savdoda ko‘k tunes baliqlari orasida tarixiy rekord o‘rnatildi. Og‘irligi 243 kilogrammni tashkil etgan ushbu baliq 510 million iyenaga, ya’ni taxminan 3,2 million dollarga sotildi.

Baliq Yaponiyaning Aomori prefekturasida tutib olingan bo‘lib, bu natija 1999-yilda qayd etilgan avvalgi rekorddan oshib ketdi. Mazkur auksion Tokiodagi Toyosu bozorida o‘tkazilib, yapon biznes an’analarida katta ahamiyatga ega.

Mahalliy tadbirkorlar uchun yilning birinchi savdosida asosiy lotni qo‘lga kiritish omad va muvaffaqiyat ramzi sifatida qabul qilinadi. Bu yilgi auksionda mashhur Sushi Zanmai restoranlar tarmog‘iga egalik qiluvchi Kiyomura Corp.

kompaniyasi g‘olib chiqdi. Kompaniya rahbari Kiyosi Kimura yuqori narxlar taklif qilishi bilan tanilgan va "tunes qiroli" nomi bilan mashhurdir.

Kimura jurnalistlarga bergan intervyusida narxning bu darajada oshishini kutmaganini aytdi. U avval ham bir necha bor rekord narxlarda tunes xarid qilgan bo‘lib, 2019-yildagi sotib olishi ham tarixiy voqea sifatida esda qolgan.

Auksion yakunida qimmatbaho tunes darhol bo‘laklanib, Sushi Zanmai restoranlari mijozlariga taqdim etildi. Ko‘plab tashrif buyuruvchilar bu taomni yilni omad bilan boshlash ramzi sifatida qabul qilishlarini ta’kidlashdi.

Yaponiyada ilk auksionlar nafaqat iqtisodiy ahamiyatga, balki madaniy qiymatga ham ega. Ushbu hodisa har yili dunyo e’tiborini jalb etib, xalqaro miqyosda katta qiziqish uyg‘otadi.