Janubiy Koreyada tug‘ilish o‘sdi, aholi kamayishda davom etmoqda
Janubiy Koreyada tug‘ilishlar soni ketma-ket ikkinchi yil o‘sish ko‘rsatganiga qaramay, mamlakatda aholi soni qisqarishda davom etmoqda. Bu haqda Zamin.uz xabar berdi.
Bunga asosiy sabab sifatida vafot etganlar sonining tug‘ilganlardan ancha yuqori bo‘lib qolayotgani ko‘rsatilmoqda. Rasmiy ma’lumotlarga ko‘ra, o‘tgan yilda mamlakatda 258 ming 242 nafar chaqaloq tug‘ilgan.
Bu ko‘rsatkich 2024 yilga nisbatan taxminan 15 ming nafarga ko‘proq bo‘lib, oxirgi yillardagi pasayish fonida ma’lum darajada umid uyg‘otgan. Ammo shu bilan birga, vafot etganlar soni 366 ming 149 nafarni tashkil etib, oldingi yilga nisbatan oshgan.
Natijada tug‘ilishlar va o‘limlar o‘rtasidagi farq 107 ming nafardan oshgan. Bu esa tabiiy aholi kamayishi olti yildan buyon davom etayotganini ko‘rsatmoqda.
Hududlar bo‘yicha eng ko‘p tug‘ilish Geonggi provinsiyasida qayd etilgan bo‘lib, bu yerda 77 mingdan ortiq bola dunyoga kelgan. Keyingi o‘rinlarda Seul va Incheon shaharlari joylashgan.
Shaharlar orasida esa Hvasong shahri tug‘ilishlar soni bo‘yicha yetakchi bo‘lib qolmoqda. Demografik tahlil shuni ko‘rsatadiki, aholining eng katta qismini 50 yosh atrofidagi insonlar tashkil etadi.
Keyingi o‘rinlarda 60 yosh va undan yuqori bo‘lganlar hamda o‘rta yoshlilar joylashgan. Bolalar va yoshlar soni esa yil sayin qisqarib bormoqda.
Mutaxassislarning fikricha, tug‘ilishdagi o‘sishga qaramay, aholining qarishi va yosh avlod ulushining kamayishi Janubiy Koreya uchun uzoq muddatli ijtimoiy va iqtisodiy muammolarni keltirib chiqarishi mumkin. Shu sababli, mamlakat hukumati demografik inqirozni yumshatishga qaratilgan chora-tadbirlarni kuchaytirishi zarur.
