Afg‘onistonda o‘zbek tiliga cheklov yo‘qligi tasdiqlandi
O‘zbekiston Tashqi ishlar vazirligi Afg‘onistonda o‘zbek tilidan foydalanishga cheklovlar qo‘yilgani haqidagi xabarlarga munosabat bildirdi. Bu haqda Zamin.uz xabar berdi.
Vazirlikning ma’lum qilishicha, bunday cheklovlar mavjud emas va afg‘onistonlik hamkorlar bilan bu masala yuzasidan doimiy muloqot olib borilmoqda. Tashqi ishlar vazirligi vakili Axror Burhonovning ta’kidlashicha, so‘nggi kunlarda ayrim ommaviy axborot vositalari va ijtimoiy tarmoqlarda tarqalgan ma’lumotlar jamiyatda xavotir uyg‘otgan.
Ushbu vaziyatga aniqlik kiritish maqsadida O‘zbekiston Tashqi ishlar vazirligi Afg‘oniston Tashqi ishlar vazirligi bilan tezkor muloqot o‘tkazgan. Afg‘oniston tomoni mazkur xabarlar haqiqatga mos kelmasligini va mamlakatda o‘zbek tilidan foydalanishga hech qanday to‘siq yo‘qligini bildirgan.
Shuningdek, afg‘on hukumati va xalqi o‘zbek xalqiga hamda uning tiliga chuqur hurmat bilan qarashlarini alohida ta’kidlagan. Afg‘oniston Tashqi ishlar vazirligining ma’lumotiga ko‘ra, hozirda mamlakatdagi oliy va umumta’lim muassasalari binolaridagi yozuvlarni yagona standartga keltirish ishlari olib borilmoqda.
Ushbu standart bo‘yicha yozuvlar pushtu, dariy va ingliz tillarida bo‘lishi belgilangan. Biroq shimoliy hududlar, jumladan, Samangan universitetida yozuvlar pushtu, dariy va o‘zbek tillarida joylashtirilishi rejalashtirilgan.
Shuningdek, qo‘shnichilik va o‘zaro do‘stlik ramzi sifatida Afg‘oniston hukumati Juzjon davlat universitetida magistratura bosqichida “O‘zbek tili va adabiyoti” fakultetini ochishni rejalashtirmoqda. Bu tarixda birinchi marta amalga oshirilayotgan muhim qadam sifatida baholanmoqda.
Eslatib o‘tamiz, avvalroq Samangan universitetining asosiy peshtoqidagi o‘zbek tilidagi yozuv mahalliy hokimiyat ko‘rsatmasi bilan olib tashlangan edi. Ushbu holat keng jamoatchilik muhokamasiga sabab bo‘ldi va natijada yozuv qayta tiklandi.
