Maduro qo‘lga olindi, Venesuelada nazorat kuchaytirildi
AQSh maxsus kuchlari Venesuela prezidenti Nikolas Maduroni qo‘lga olganini e’lon qilganidan so‘ng, mamlakat poytaxti Karakasda vaziyat keskin o‘zgarib ketdi. Bu haqda Zamin.uz xabar berdi.
Hokimiyat tepasida vaqtincha vitse-prezident Delsi Rodriges turgani, boshqaruv tizimi esa qat’iy nazoratga o‘tkazilgani aytilmoqda. Ko‘chalarda xavfsizlik choralarining kuchaytirilishi, patrullar sonining oshishi, blokpostlar o‘rnatilishi va tekshiruvlarning kuchaygani kuzatilmoqda.
Xorijiy manbalarning xabar berishicha, mamlakatda vaqtincha rahbarlik Rodriges qo‘lida to‘plangan. Karakas va boshqa yirik shaharlarda yo‘lovchilarni to‘xtatish, avtomashinalarni tekshirish, hatto telefonlarni nazorat qilish holatlari keng tarqalgan.
Rasmiylarga ko‘ra, bu choralar AQSh amaliyotiga yordam bergan shaxslarni aniqlashga qaratilgan. Ayrim muxolifat faollari va jurnalistlarning qo‘lga olingani haqida ham ma’lumotlar bor.
E’tiborlisi, patrullarda harbiylar va politsiya bilan birga, kolektivos deb ataluvchi qurolli guruhlar ham ishtirok etmoqda. Ular davlatni qo‘llab-quvvatlovchi guruhlar sifatida tanilgan va avval ham muxolifatga qarshi kuch ishlatish holatlari bilan bog‘langan.
Kolektivos ko‘pincha mustaqil markazlashmagan guruhlar yig‘indisi sifatida qaraladi. Ularning vazifasi davlatni himoya qilish, ko‘chalarda nazorat o‘rnatish va norozilik kayfiyatini bostirishdan iborat.
Bugungi vaziyatda ularning faoliyati jamiyatga kuchli nazorat va cheklovlar haqida signal bermoqda. Karakas markazidagi Miraflores saroyi atrofidagi xavfsizlik choralarining kuchaytirilgani ham shuni ko‘rsatadi.
Prezident Maduro esa so‘nggi vaqtlarda poytaxt janubidagi Fuerte-Tiun harbiy bazasida ko‘proq paydo bo‘layotgani aytilmoqda. Shu bilan birga, mamlakat ichida nazorat haddan tashqari oshgani sababli tushunmovchiliklar ham yuzaga kelmoqda.
Masalan, Miraflores yaqinida uchib o‘tgan dronlarga qarata o‘t ochilgan, ammo keyinchalik ularning politsiyaga tegishli ekani aniqlangan. Bu kabi holatlar vaziyatning naqadar murakkab va asabiy ekanini anglatadi.
Xorijdagi Venesuela diasporasi Maduroning qo‘lga olinganini xursandchilik bilan kutib olgan bo‘lsa-da, mamlakat ichkarisida bunday kayfiyat kuzatilmagan. Ko‘pchilik rejimning asosiy mexanizmlari o‘z o‘rnida qolayotgani va faqat rahbar o‘zgarganini ta’kidlamoqda.
Noaniqlik va ishonchsizlik jamiyatdagi asosiy kayfiyatga aylangan. Mamlakat ichida kichik aksiyalar o‘tkazilgan bo‘lsa-da, ular turli yo‘nalishlarda bo‘lib o‘tgan.
Ayrim guruhlar AQShning aralashuviga qarshi chiqishgan. Iqtisodiy holat ham murakkabligicha qolmoqda.
Do‘konlar cheklov bilan ishlayotgani, odamlar vahimaga tushib, oziq-ovqat zaxirasini ko‘paytirishga harakat qilayotgani kuzatilmoqda. Ayrim hududlarda elektr va suv ta’minoti uzilishi, aloqa muammolari ham kuzatilmoqda.
Bularning barchasi xalq orasida tushunmovchilik va kelajakdan xavotir tug‘dirayotganini ko‘rsatadi. Maduroning qo‘lga olingani haqidagi xabar nafaqat Venesuela, balki mintaqadagi siyosiy muvozanat uchun ham muhim voqea bo‘lib, mamlakatda kuchli nazorat, cheklovlar va noaniqlik hukm surmoqda.
Aholining asosiy savoli esa bir xil: ertaga nima bo‘ladi?
