AQSH B1/B2 vizasi uchun garov tartibi joriy qilindi
AQSH Davlat departamenti B1/B2 (turistik va ishbilarmonlik) vizalari uchun yangi tartib joriy etilganini ma’lum qildi. Bu haqda Zamin.uz xabar berdi.
Endilikda ayrim davlatlar fuqarolari viza olish jarayonida majburiy garov (bond) to‘lashi kerak bo‘ladi. Bu chora asosan viza muddatini buzish ko‘rsatkichi yuqori bo‘lgan mamlakatlarga nisbatan qo‘llanadi.
**Qaysi davlatlar ro‘yxatga kiritilgan?** Davlat departamenti garov talab qilinadigan davlatlar ro‘yxatini e’lon qilgan. Unda Markaziy Osiyo davlatlari ham kiritilgan: - Qirg‘iziston — 2026 yil 21 yanvardan, - Tojikiston — 2026 yil 21 yanvardan, - Turkmaniston — 2026 yil 1 yanvardan.
Shuningdek, ro‘yxatda Afrika, Osiyo, Karib havzasi va Lotin Amerikasidagi bir qancha mamlakatlar ham bor. Ro‘yxat oxirgi marta 2026 yil 6 yanvar holatiga yangilangan.
**Garov miqdori qancha?** Agar ariza beruvchi B1/B2 vizasi uchun ma’qullansa, u 5 mingdan 15 ming dollargacha garov to‘lashi kerak bo‘ladi. To‘lov miqdorini konsul viza suhbatida belgilaydi.
Shuningdek, DHS’ning I-352 shakli ham taqdim etiladi. **To‘lov qanday amalga oshiriladi?** Garov faqat konsul ko‘rsatmasidan keyin to‘lanadi.
Ariza beruvchi rasmiy Pay.gov platformasi orqali to‘lovni amalga oshiradi. Uchinchi tomon saytlaridan foydalanish qat’iyan man etilgan.
Muhim jihat: garov to‘lansa ham bu vizani kafolatlamaydi. Konsul ko‘rsatmasisiz amalga oshirilgan to‘lovlar qaytarilmasligi ochiq aytilgan.
**AQSHga kirish va chiqish tartibi** Garov to‘lagan vizasi bor fuqarolar AQSHga faqat quyidagi aeroportlar orqali kirib-chiqishlari shart: - Boston Logan (BOS), - New York JFK (JFK), - Washington Dulles (IAD). Bu qoidalarga amal qilinmasa, kirish rad etilishi yoki chiqish noto‘g‘ri qayd qilinishi mumkin.
**Garov qachon qaytariladi yoki “kuyadi”?** Garov quyidagi holatlarda avtomatik ravishda qaytariladi: - AQSHdan ruxsat etilgan muddat ichida chiqib ketilsa, - viza muddati tugaguniga qadar AQSHga safar qilinmasa, - aeroportda AQSHga kirish rad etilsa. Agar viza shartlari buzilsa, masala USCIS tomonidan ko‘rib chiqiladi va garov qaytarilmaydi.
**Xulosa** B1/B2 vizasi uchun yangi tartib avvalgiga qaraganda ancha qat’iy. Kimgadir 5 ming, kimgadir 15 ming dollarlik garov to‘lovi joriy etilmoqda.
Safar rejalashtirayotganlar uchun rasmiy ro‘yxat va sanalarni diqqat bilan o‘rganish muhim. Ro‘yxat vaqti-vaqti bilan yangilanadi.
