Rossiya 2030 yilga borib O‘zbekistonga gaz eksportini ikki baravar oshiradi
Rossiya 2030 yilga borib O‘zbekiston va Markaziy Osiyo mamlakatlariga gaz eksportini sezilarli darajada oshirishni rejalashtirmoqda. Bu haqda Zamin.uz xabar berdi.
Xususan, O‘zbekistonga yetkazib beriladigan gaz hajmi hozirgi 5,6 milliard kub metrdan 12 milliard kub metrgacha ko‘tarilishi kutilmoqda. Bu haqda Kursiv.uz xabar berdi.
Shuningdek, gaz eksportining Qozog‘iston va Qirg‘izistonga ham oshishi rejalashtirilgan. Qozog‘istonga yuboriladigan gaz hajmi 3 milliard kub metrdan yiliga 6-7 milliard kub metrgacha, Qirg‘izistonga esa 0,5 milliard kub metrdan 1 milliard kub metrgacha yetishi mumkin.
«Gazprombank» huzuridagi iqtisodiy prognozlash markazi hisob-kitoblariga ko‘ra, 2030 yilga kelib Rossiyaning Markaziy Osiyo mamlakatlariga gaz eksporti hajmi yiliga 19-20 milliard kub metrga yetadi. Bu ko‘rsatkich 2024 yilga nisbatan ikki baravardan ham ko‘proq bo‘ladi.
Mutaxassislarning fikricha, ushbu rejalar asosan Rossiyaning Yevropa bozoridagi yo‘qotishlarini Markaziy Osiyo orqali qoplashga urinishlari bilan bog‘liq. Biroq gaz yetkazib berish hajmini oshirish texnik va iqtisodiy masalalarning hal etilishiga bog‘liq bo‘ladi.
Avvalo, «Markaziy Osiyo – Markaz» gaz quvuri infratuzilmasini qayta qurish zarur. Shu bilan birga, O‘zbekiston, Qozog‘iston va Qirg‘iziston ushbu quvur quvvatlaridan foydalanish uchun o‘zaro raqobatga kirishishi mumkin.
