Nemislar AQSh siyosatidan norozilik bildirmoqda

AQShning Janubiy Amerikadagi harbiy aralashuvi Germaniya jamoatchiligi orasida keskin norozilik va xavotir uyg‘otdi. Bu haqda Zamin.uz xabar berdi.

Yaqinda o‘tkazilgan «Deutschlandtrend» ijtimoiy so‘rovnomasi natijalariga ko‘ra, nemislar orasida AQShga bo‘lgan ishonch rekord darajada pasaygan. O‘tkazilgan tadqiqotlarga ko‘ra, nemislarning 72 foizi Venesuelaga nisbatan harbiy hujumni asossiz deb hisoblamoqda.

Shuningdek, 82 foiz aholi xalqaro siyosatda huquq tamoyillaridan ko‘ra kuchli davlatlarning manfaatlari ustun bo‘lib borayotganidan xavotir bildirmoqda. Nemislarning yarmi esa Germaniya hukumatidan AQSh siyosatini ochiqchasiga tanqid qilishni talab qilmoqda, hatto bu Donald Tramp ma’muriyati bilan munosabatlarning yomonlashuviga olib kelsa ham.

Hozirgi kunda atigi 15 foiz nemislar AQShni ishonchli ittifoqchi deb biladi. Bu so‘rovnomalar tarixidagi eng past ko‘rsatkichdir.

Taqqoslash uchun, Fransiyaga 78 foiz, Buyuk Britaniyaga esa 74 foiz respondent ishonch bildirgan. Ukrainaga bo‘lgan ishonch 40 foizni tashkil etsa, Rossiyaga bo‘lgan ishonch atigi 9 foizga teng.

So‘rov natijalariga ko‘ra, nemislarning aksariyati NATOga qaramlikni kamaytirish va mustaqil Yevropa harbiy ittifoqini tuzish g‘oyasini qo‘llab-quvvatlamoqda. Bu fikr ayniqsa AQShning xavfsizlik kafolatlariga shubha bilan qarayotgan nemislar orasida ommalashgan.

Bundan tashqari, xalqaro siyosatdagi beqarorlik Germaniyaning ichki siyosatiga ham ta’sir ko‘rsatmoqda. Mamlakatdagi hukumat faoliyatidan atigi 20 foiz aholi qoniqmoqda.

So‘rov natijalariga ko‘ra, agar saylovlar yaqin kunlarda o‘tkazilsa, Xristian-demokratlar va Xristian-sotsial ittifoqi (XDI/XSI) bloki 28 foiz, muxolifatdagi "Germaniya uchun muqobil" (AfD) partiyasi esa 25 foiz ovoz olishi mumkin edi. Iqtisodiy pasayish va migratsiya masalalari Germaniya jamiyatidagi eng dolzarb muammolar sifatida qolmoqda.

Ko‘pchilik hukmron koalitsiyaning kelajagiga katta shubha bilan qaramoqda. Shu nuqtai nazardan, Germaniyaning NATO doirasidagi o‘rnini saqlab qolishi yoki mustaqil xavfsizlik tizimini shakllantirishi masalasi jamoatchilikda qizg‘in muhokama qilinmoqda.