Quyoshning orqa tomonida kuchli portlash yuz berdi

8-yanvar kuni Quyoshda kuchli portlash yuz berdi. Bu haqda Zamin.uz xabar berdi.

Bu haqda Markaziy Osiyo Quyosh astronomiyasi laboratoriyasi rasmiy ma’lumot berdi. Mutaxassislarning ta’kidlashicha, kunning o‘rtalarida Quyoshda yuqori faollik kuzatilgan.

Koronograflar orqali olingan suratlarda moddaning turli yo‘nalishlarga yuqori tezlikda otilib chiqishi aniq ko‘ringan. Laboratoriya xabariga ko‘ra, portlashning asosiy manbai Quyoshning orqa tomonida joylashgan, ya’ni bu qism hozirda Yerga qarama-qarshi holatda.

Shu sababli hech bir sun’iy yo‘ldosh mazkur jarayonni to‘g‘ridan to‘g‘ri kuzatmagan. Hozirgi kunda portlash tafsilotlari faqat kosmik asboblar yordamida taxminan baholanmoqda.

Mutaxassislar ikki hafta avval Quyoshning hozir ko‘rinmayotgan qismi Yerga qaragan paytda, u yerda jiddiy xavotirga sabab bo‘ladigan hodisalar qayd etilmaganini ma’lum qilishmoqda. Faqatgina bir necha o‘rta darajadagi chaqnashlar kuzatilgan.

Shu ma’lumotlar asosida hozirgi portlashning qaysi hudud bilan bog‘liq bo‘lishi mumkinligi haqida taxminlar ilgari surilmoqda. Olimlarning fikriga ko‘ra, agar bu portlash faollik kuzatilgan hududlardan biri bilan bog‘liq bo‘lsa, u Quyosh diskining ekvatordan pastki qismida, o‘ng tomonda joylashgan dog‘lar guruhi atrofida yuz bergan bo‘lishi mumkin.

Ammo bu hali faqat taxminiy xulosa. Portlash joyini aniqlash uchun qo‘shimcha vaqt talab etiladi.

Qiziq tomoni shundaki, portlash manbai taxminan bir haftadan so‘ng aniqroq kuzatilishi mumkin. Chunki Quyoshdagi dog‘lar guruhi uning aylanishi sababli chap ufqdan chiqib, Yerga tomon yaqinlashadi.

Shu vaqtda olimlar portlashning manbasi haqida batafsilroq ma’lumot olish imkoniga ega bo‘lishadi. O‘shanda portlash qayerdan kelib chiqqani bo‘yicha aniqroq xulosa qilish mumkin bo‘ladi.