Rossiyada migrantlar uchun tibbiy ko‘rik talablari kuchaytirilmoqda
Rossiyada majburiy tibbiy ko‘rikdan o‘tishdan bosh tortgan chet el fuqarolariga nisbatan jarima qo‘llash va sud orqali ularni mamlakatdan chiqarib yuborish imkoniyati ko‘rib chiqilmoqda. Bu haqda Zamin.uz xabar berdi.
Ushbu masala bo‘yicha qonun loyihasi yaqin kunlarda Davlat dumasiga taqdim etilishi rejalashtirilgan. Bu haqda Davlat Dumasining quyi palatasi spikeri Vyacheslav Volodin ma’lum qildi, deb xabar bermoqda kursiv.uz.
Yangi tartibga ko‘ra, uch oydan ortiq muddatga Rossiyaga kelgan migrantlar tibbiy ko‘rikdan 90 kun ichida emas, balki 30 kun ichida o‘tishi shart bo‘ladi. Tibbiyot muassasalari o‘z xulosalarini Ichki ishlar vazirligiga taqdim etishi, yuqumli kasalliklar aniqlangan taqdirda esa bu haqdagi ma’lumotni Rospotrebnadzorga yuborishi belgilangan.
Shuningdek, xavfli kasalliklar yo‘qligini tasdiqlovchi tibbiy hujjatlarni soxtalashtirish yoki bunday hujjatlarni tarqatishga qarshi jazoni kuchaytirish taklif etilmoqda. Ushbu chora-tadbirlar migrantlar oqimini tartibga solish va sog‘liqni saqlash sohasidagi xavfsizlikni oshirish maqsadida ishlab chiqilmoqda.
