Eronda noroziliklar kuchayib, internet cheklovlari joriy etildi
Eronda davom etayotgan norozilik namoyishlari sababli hukumat internet va aloqa xizmatlariga cheklovlar joriy etdi. Bu haqda Zamin.uz xabar berdi.
Bu holat mamlakatning tashqi dunyo bilan aloqasini deyarli uzib qo‘ydi. Telefon aloqasi ishlamayapti, mahalliy axborot saytlarining faoliyati cheklangan, ayrim xalqaro aviareyslar bekor qilingan.
Norozilik namoyishlari dastlab iqtisodiy muammolar, xususan inflyatsiyaning oshishi va milliy valyuta qadrsizlanishi tufayli boshlangan edi. Keyinchalik ba’zi hududlarda namoyishlar siyosiy tus olib, hukumatga qarshi shiorlar bilan davom etmoqda.
Ma’lumotlarga ko‘ra, turli shaharlarda yuz bergan to‘qnashuvlar oqibatida qurbonlar ham bor. Eron Oliy rahbari Oyatulloh Ali Xomanaiy televideniye orqali chiqish qilib, tartibsizliklarda qatnashayotgan ayrim shaxslarni xorijiy kuchlar manfaatiga xizmat qilishda aybladi.
Rasmiylar esa jamoat tartibini buzish va davlat mulkiga zarar yetkazishga qarshi qat’iy choralar ko‘rilishini ta’kidlashmoqda. Mutaxassislar vaziyatni og‘ir iqtisodiy sharoit, xalqaro sanksiyalar va tashqi bosimlar bilan bog‘lamoqda.
Internet cheklovlari sababli vaziyatni mustaqil manbalar orqali baholash qiyinlashmoqda, biroq rasmiylar nazoratni qo‘ldan boy bermayotganini ma’lum qilmoqda.
