Donald Trampning nabirasi Kay shaxsiy hayotini ochdi
AQShning sobiq prezidenti Donald Trampning 18 yoshli nabirasi Kay Tramp shaxsiy hayotidagi muammolar haqida ochiq gapirdi. Bu haqda Zamin.uz xabar berdi.
U xavfsizligini ta’minlaydigan qo‘riqchilarning doimiy nazorati tufayli hayotida yuzaga kelgan qiyinchiliklarni tasvirlab berdi. Bu haqida Kay o‘z fikrlarini mashhur bloger Logan Polning "Impaulsive" podkastida bildirgan.
Kayning so‘zlariga ko‘ra, qo‘riqchilarning doimiy hamrohligi uning erkinligiga jiddiy ta’sir ko‘rsatmoqda. U kundalik vaziyatlarda ham o‘zini noqulay his qilayotganini yashirmadi.
“Do‘stlarim bilan vaqt o‘tkazayotganimda yoki oddiy uchrashuvlarda qo‘riqchilarning yaqin masofada bo‘lishi juda g‘alati tuyuladi. Masalan, ular bir metr orqamda tursa, bu holat muloqotga ta’sir qiladi”, — deydi Kay.
Kay romantik uchrashuvlar paytida ham noqulaylik sezishini qo‘shimcha qildi. “Bir yigit bilan uchrashuvda bo‘lib, agent ikki stol narida kuzatib tursa, bu juda noqulay.
Ammo bunga e’tibor bermaslikka harakat qilaman”, — dedi u. Shuningdek, Kay bobosi Donald Tramp prezidentlikka qayta saylanganidan so‘ng bu holatga ko‘nikishga majbur bo‘lganini aytdi.
U qo‘riqchilarni kundalik hayotining bir qismi sifatida qabul qilishga o‘rgangan. Uning so‘zlariga ko‘ra, shunga o‘xshash nazorat amakisi Barron Trampga ham taalluqli.
Barronning uchrashuvga chiqishi uchun maxsus xavfsizlik choralari ko‘rilgani, hatto Trump Tower binosining butun bir qavati tekshirilgani aytiladi. Kay hozircha oila qurish haqida o‘ylamayotgani, avval karerasiga e’tibor qaratmoqchi ekanini ta’kidladi.
Uning onasi Vanessa Tramp ham doim unga “avvalo karera, keyin boshqa narsalar” deb maslahat beradi. Kay o‘z oldiga golf bo‘yicha professional karera qurishni va musobaqalarda muvaffaqiyatga erishishni maqsad qilganini ma’lum qildi.
Vanessa Tramp bir paytlar model bo‘lgan va besh farzandni voyaga yetkazgan. Kay ham onasining maslahatlariga amal qilib, hayotini rejalashtirishni o‘z oldiga maqsad qilib olgan.
