Jim Rodjers sarmoyasini O‘zbekiston bozoriga yo‘naltirdi
Mashhur amerikalik investor Jim Rodjers o‘z sarmoya strategiyasida yangi yo‘nalishga o‘tdi. Bu haqda Zamin.uz xabar berdi.
U AQSh bozoridagi aksiyalarini sotib, sarmoyasining bir qismini O‘zbekiston fond bozoriga yo‘naltirdi. Rodjersning ta’kidlashicha, AQSh fond bozori 2009 yildan buyon uzluksiz o‘sishga ega bo‘lib kelmoqda va bu tarixdagi eng uzoq davom etgan o‘sish davrlaridan biridir.
Uning so‘zlariga ko‘ra, AQSh bozoridagi aksiyalar narxi o‘z cho‘qqisiga yetgan va bu o‘sish yakunlanayotgani ko‘zga tashlanmoqda. Shu sababli u barcha aktivlarini sotishga qaror qilgan.
Rodjers O‘zbekiston aksiyalarini 2025 yil oxirida o‘z portfeliga kiritganini ma’lum qildi. U buni noodatiy, lekin istiqbolli yo‘nalish sifatida baholagan.
Investorning so‘zlariga ko‘ra, Toshkent fond birjasida savdoda bo‘lgan aksiyalar ko‘p emas, shuning uchun u deyarli barcha mavjud aksiyalarni sotib olgan. Hozirda Toshkent fond birjasida 85 ta kompaniya aksiyalari muomalada bo‘lib, ular bank, neft-gaz, telekommunikatsiya kabi sohalarni qamrab oladi.
Rodjers O‘zbekiston bozoriga qiziqishini ilk bor 2021 yilda bildirgan edi. U mamlakatda amalga oshirilayotgan islohotlar, xususiylashtirish jarayonlari va IPO rejalarini diqqat bilan kuzatib kelgan.
Investor o‘zbek kompaniyalari aksiyalariga ega ekanini va o‘zbek milliy valutasiga ishonishini alohida ta’kidladi. Shuningdek, u Xitoy bozoridagi ayrim aktivlarini hali sotmaganini, biroq kelgusida bu qarorini qayta ko‘rib chiqishi mumkinligini istisno etmadi.
Shu bilan birga, Rodjers hali ham dollarda katta miqdorda naqd mablag‘ saqlayotganini ma’lum qildi. Uning fikricha, global inqiroz sharoitida dollar hali ham eng ishonchli valyuta sifatida o‘z mavqeini saqlab qolmoqda.
