Hindiston va AQSh savdo kelishuvi nega to‘xtadi?

Hindiston va AQSh o‘rtasidagi savdo kelishuvi o‘tgan yili qiyinchiliklar sababli to‘xtab qolgan. Bu haqda Zamin.uz xabar berdi.

Reuters agentligining xabar berishicha, AQSh Savdo vaziri Govard Lyutnik kelishuvning amalga oshmay qolishiga Hindiston bosh vaziri Narendra Modining bitim oldidan Donald Trampga qo‘ng‘iroq qilmagani sabab bo‘lgani haqida ma’lum qilgan. Ushbu holat haqida kursiv.uz nashri ham xabar tarqatgan.

Hindiston tomoni esa bu da’volarni rad etmoqda. Reuters manbalariga ko‘ra, muzokaralar boshi berk ko‘chaga kirib qolganidan so‘ng, AQSh Hindistondan import qilinadigan ayrim mahsulotlarga boj stavkalarini 50 foizgacha oshirgan.

Shuningdek, Donald Tramp Hindistonga Rossiyadan neft importini kamaytirmasa, tariflar yana oshirilishi mumkinligi haqida ogohlantirgan. Natijada, kelishuv amalga oshmagani sababli Hindiston valyutasi – rupiya rekord darajada qadrsizlangan.

Bu holat investorlar orasida muzokaralarning kelajagiga nisbatan xavotirlarni kuchaytirgan. Shunga qaramay, Hindiston boj stavkalari AQShning Buyuk Britaniya va Vyetnam bilan kelishgan shartlari darajasida bo‘lishidan umid qilmoqda.

Ammo Govard Lyutnikning so‘zlariga ko‘ra, bu taklif bo‘yicha belgilangan muddat allaqachon tugagan.