AQSh kompaniyalari Venesuela neft savdosiga qiziqmoqda
Chevron, Vitol va Trafigura kompaniyalari AQSh hukumati bilan Venesueladan neft eksportini yo‘lga qo‘yish bo‘yicha shartnomalar olishga harakat qilmoqda. Bu haqda Zamin.uz xabar berdi.
Bu haqda Reuters axborot agentligi o‘z manbalariga tayanib xabar berdi. Ushbu kompaniyalar Venesuela neft savdosi hamda mamlakat daromadlarini nazorat qilish imkoniyatidan manfaatdor.
Reuters ma’lumotiga ko‘ra, ushbu reja Venesuela prezidenti Nikolas Maduroni hokimiyatdan chetlashtirish ssenariysi bilan bog‘liq. Muzokaralar davomida kompaniyalar davlatga qarashli PDVSA omborlarida saqlanayotgan 50 million barrelgacha bo‘lgan neftni sotish huquqini qo‘lga kiritish uchun raqobatlashmoqda.
Hozircha kelishuvlar tafsilotlari oshkor qilinmagan. Venesuelada faoliyat olib borayotgan yagona yirik amerikalik neft kompaniyasi Chevron o‘z litsenziyasini kengaytirishga umid qilmoqda.
Ammo bu safar u xorijiy kompaniyalar bilan to‘g‘ridan-to‘g‘ri raqobat qilishga majbur bo‘ladi. Shveysariyada joylashgan Vitol kompaniyasi esa AQShdan 18 oylik dastlabki litsenziyani olishga muvaffaq bo‘lgan.
Reuters xabariga ko‘ra, Venesuelada yillar davomida sarmoya yetishmasligi va sanksiyalar tufayli neft qazib olish hajmi keskin kamaygan. Hozirda mamlakatda kuniga taxminan 1 million barrel neft qazib olinmoqda, holbuki 1970-yillarda bu ko‘rsatkich 3,5 million barrelni tashkil etgan edi.
