Erondagi noroziliklar: 65 kishi halok bo‘ldi
AQSh senatorlaridan biri Marko Rubio o‘zining ijtimoiy tarmoqdagi sahifasida Erondagi norozilik namoyishchilarini qo‘llab-quvvatlashini ma’lum qildi. Bu haqda Zamin.uz xabar berdi.
U Qo‘shma Shtatlar Erondagi jasur xalqni qo‘llab-quvvatlashini ta’kidlagan. Bu haqda ommaviy axborot vositalari xabar bermoqda.
Eronda ommaviy noroziliklar o‘tgan oy Tehrondagi Katta bozorda milliy valyuta – rialning keskin qadrsizlanishi ortidan boshlandi. Keyinchalik iqtisodiy qiyinchiliklar, yuqori inflyatsiya, xalqaro sanksiyalar va erkinliklarning cheklanishi sababli noroziliklar butun mamlakat bo‘ylab tarqaldi.
Ushbu namoyishlar so‘nggi uch yillikdagi eng yirik ijtimoiy chiqishlar sifatida qayd etilmoqda. Noroziliklar davom etar ekan, Eron armiyasi davlat mulki va strategik infratuzilmani himoya qilishga tayyorligini bildirdi.
Shu bilan birga, tartibsizliklarni bostirishda Islom inqilobi qo‘riqchilari korpusi ham faol ishtirok etmoqda. Reuters agentligining xabariga ko‘ra, Eron hukumati yuzaga kelgan vaziyatda Isroil va boshqa kuchlarni ayblamoqda.
Eronlik huquq himoyachilari ma’lumotiga ko‘ra, 9-yanvar holatiga ko‘ra, noroziliklar davomida 65 kishi halok bo‘lgan, ulardan 50 nafari namoyishchilar, 15 nafari esa huquq-tartibot organlari xodimlari bo‘lgan. Shuningdek, 2,5 mingga yaqin odam qo‘lga olingani haqida xabar berilgan.
Namoyishchilarning ayrimlari sobiq Pahlaviylar sulolasini qo‘llab-quvvatlovchi shiorlarni aytgan bo‘lsa, asosiy talablar ruhoniylar hokimiyatini tugatish, xalqaro sanksiyalar oqibatida zarar ko‘rgan iqtisodiyotni tiklash va aniq choralar ko‘rish bilan bog‘liq bo‘lgan.
