Isroil va HAMAS o‘rtasida ziddiyatlar kuchayishi mumkin
Isroil va HAMAS o‘rtasidagi ziddiyatlar yana kuchayishi mumkin. Bu haqda Zamin.uz xabar berdi.
G‘azo sektorida janglar qayta boshlanishi ehtimoli borligi haqida The Wall Street Journal nashri Isroil va Birlashgan Arab Amirliklari rasmiylariga tayanib xabar berdi. Ma’lum qilinishicha, HAMAS AQSh prezidenti Donald Tramp tomonidan taklif etilgan tinchlik rejasi doirasida imzolangan kelishuvga qaramay, qurolsizlanishdan bosh tortmoqda.
Shu sababli Isroil armiyasi Falastin aholisi yashaydigan qirg‘oq hududida yangi harbiy operatsiya o‘tkazish rejasini ishlab chiqqan. HAMAS harakati urushda yo‘qotilgan kuchini qayta tiklashga harakat qilmoqda.
Ular vayron bo‘lgan tunnel infratuzilmasini ta’mirlash, o‘z a’zolariga muntazam to‘lovlarni amalga oshirish kabi ishlarni davom ettirmoqda. Shuningdek, yangi rahbar saylanishi bilan HAMASning qurolsizlanish masalasidagi pozitsiyasi o‘zgarishi mumkinligi ham aytilmoqda.
G‘azodagi urush 2023-yil 7-oktyabrda HAMASning hujumi bilan boshlangan edi. Isroilning javob zarbalari natijasida 71 mingdan ortiq falastinlik halok bo‘ldi, ularning ko‘pchiligi tinch aholi vakillari edi.
2025-yil 10-oktyabrda erishilgan otashkesim G‘azo shahridagi minglab odamlarning xarobalarga qaytishiga imkon berdi. Biroq, sulh shartlariga qaramay, Isroil tomonidan amalga oshirilgan zarbalarda yana 400 kishi halok bo‘ldi, Isroil armiyasi esa uch askarini yo‘qotdi.
