Voronejda dron hujumi: bir ayol halok bo‘ldi.
Rossiyaning Voronej shahrida Ukraina tomonidan amalga oshirilgan dron hujumi oqibatida bir ayol halok bo‘ldi, uch kishi esa jarohat oldi. Bu haqda Zamin.uz xabar berdi.
Bu haqda Voronej gubernatori Aleksandr Gusev ma’lum qildi. Hujum davomida 10 dan ortiq ko‘p qavatli uy, 10 ga yaqin xususiy uy, bir o‘rta maktab va bir nechta ma’muriy binolar zarar ko‘rgan.
Gubernatorning so‘zlariga ko‘ra, bu shahar maxsus harbiy operatsiya boshlanganidan beri duch kelgan eng jiddiy dron hujumlaridan biri bo‘lgan. Voronej shahri Moskva markazidan 470 kilometr, Ukraina chegarasidan esa taxminan 250 kilometr masofada joylashgan.
Hujumning to‘liq miqyosi va zarar ko‘lamini aniqlash ishlari davom etmoqda. Hozircha mustaqil tasdiqlovchi ma’lumotlar mavjud emas.
Ukraina rasmiylari Rossiya hududidagi obyektlarni nishonga olishlarini ta’kidlamoqda. Ularning fikricha, bunday harakatlar Rossiyaning Ukrainaga qarshi amalga oshirayotgan urushi va Ukraina hududidagi raketa hamda dron hujumlariga javob sifatida amalga oshirilmoqda.
