AQSh Qirg‘iziston, Tojikiston va Turkmaniston fuqarolaridan viza uchun garov talab qiladi
AQSh Davlat departamenti yangi tajriba dasturini ishga tushirib, Qirg‘iziston, Tojikiston va Turkmaniston fuqarolari uchun viza olishda 15 ming dollargacha garov puli talab qilishi mumkinligini e’lon qildi. Bu haqda Zamin.uz xabar berdi.
O‘zbekiston fuqarolari ushbu tartibdan istisno qilingan. Bu haqda Kursiv.uz xabar bermoqda.
Mazkur talablar B1/B2 toifasidagi vizalar – xizmat safari va turistik safarlar uchun ariza topshiruvchilarga tegishli. Turkmaniston fuqarolari uchun ushbu tartib 2026-yil 1-yanvardan kuchga kirgan bo‘lsa, Qirg‘iziston va Tojikiston fuqarolari uchun 2026-yil 21-yanvardan joriy etilishi belgilangan.
Yangi tartibga ko‘ra, AQSh konsulliklari viza suhbati davomida arizachidan 5 ming, 10 ming yoki 15 ming dollar miqdorida garov puli kiritishni talab qilishi mumkin. Garov summasi har bir ariza uchun alohida belgilanadi va migratsion xavf omillari inobatga olinadi.
Bundan tashqari, moliyaviy garovdan tashqari qo‘shimcha cheklovlar ham mavjud. Bunday viza egalari AQShga faqat uchta xalqaro aeroport orqali kirib-chiqish huquqiga ega bo‘ladi.
AQSh rasmiylari ushbu choralar vaqtinchalik tajriba sifatida joriy etilganini, uning maqsadi esa moliyaviy kafolatlarning migratsiya nazorati uchun samaradorligini baholash ekanini ta’kidladi.
