Solovyov: Rossiya postsovet hududida harbiy operatsiyalar o‘tkazishi mumkin

Rossiyalik taniqli teleboshlovchi va propagandachi Vladimir Solovyov o‘zining «Solovyov LIVE» dasturida Rossiya Ukrainadan tashqari postsovet hududidagi boshqa davlatlarda ham «maxsus harbiy operatsiyalar» (SVO) o‘tkazishi mumkinligini aytib o‘tdi. Bu haqda Zamin.uz xabar berdi.

Uning bu bayonoti MDH davlatlarida jiddiy xavotir uyg‘otdi. Dastur davomida Solovyov AQSHning Grenlandiya va Venesueladagi siyosatini misol keltirib, Amerika xalqaro qoidalarni mensimasdan, o‘z manfaatlarini birinchi o‘ringa qo‘yishini ta’kidladi.

Uning fikricha, AQSH o‘zining «bu meniki» tamoyiliga asoslanib harakat qilmoqda va xalqaro kelishuvlarga e’tibor bermayapti. Solovyov Rossiya siyosatini ham shu nuqtai nazardan o‘rganib, mamlakatning ta’sir doiralarini kengaytirish zarurligini ilgari surdi.

Uning aytishicha, Rossiya uchun Yaqin Sharq yoki Lotin Amerikasidan ko‘ra postsovet mintaqasi, xususan, Markaziy Osiyo va Armaniston muhim ahamiyatga ega. Solovyov Armaniston bilan aloqalarni yo‘qotish Rossiya uchun katta yo‘qotish bo‘lishini ta’kidladi.

Shuningdek, u Markaziy Osiyodagi vaziyatni alohida tilga olib, bu mintaqa Rossiya milliy xavfsizligi uchun strategik ahamiyatga ega ekanini aytdi. Solovyovning ta’kidlashicha, Moskva o‘z maqsadlarini aniq belgilab, ta’sir doiralarini himoya qilishga jiddiy e’tibor qaratishi lozim.

U Rossiyaning xalqaro huquq va tartibga nisbatan o‘z pozitsiyasini ochiq-oydin ma’lum qilishi kerakligini aytdi. Uning fikricha, Ukrainadagi «maxsus harbiy operatsiya» tajribasidan kelib chiqib, Rossiya boshqa mintaqalarda ham shunday harakatlarni amalga oshirishi mumkin.

Eslatib o‘tamiz, Vladimir Solovyov Rossiya ommaviy axborot vositalarida keskin va agressiv chiqishlari bilan tanilgan. Uning bu galgi bayonotlari ham MDH davlatlari, xususan, O‘zbekiston va Qozog‘istonda salbiy munosabat bilan qarshi olindi.