Rossiya Ukrainada yangi «Geran-5» dronini sinovdan o‘tkazdi
2026 yil boshida Ukraina osmonida yangi turdagi xavfli qurol – «Geran-5» droni ilk bor qo‘llanildi. Bu haqda Zamin.uz xabar berdi.
Ukraina Mudofaa vazirligi Bosh razvedka boshqarmasi ma’lumotiga ko‘ra, Rossiya armiyasi bu dronni zarba beruvchi vosita sifatida ilk marta sinovdan o‘tkazdi. «Geran-5» avvalgi modellardan o‘lchami va texnik imkoniyatlari bilan farq qiladi.
Razvedka xabariga ko‘ra, dronning uzunligi qariyb 6 metr, qanotlari kengligi esa 5,5 metrni tashkil etadi. Jangovar qismi 90 kilogramm og‘irlikda bo‘lib, 1000 kilometr masofadagi nishonni yo‘q qilish imkoniga ega.
Qurilma «Kometa» navigatsiya tizimi, Raspberry mikrokompyuteri va 3G/4G modemlar bilan jihozlangan. Dron Telefly reaktiv dvigatelidan foydalangan holda harakatlanadi.
Mutaxassislar fikriga ko‘ra, «Geran-5» Rossiyaning mustaqil ishlanmasi emas. U Eronning «Karrar» droniga konstruktiv jihatdan o‘xshaydi.
Rossiya muhandislari ushbu modelni «Geran» seriyasining boshqa namunalari bilan uyg‘unlashtirish orqali ishlab chiqarish jarayonini soddalashtirgan. RF harbiy qo‘mondonligi drondan foydalanishni yanada samaraliroq qilish yo‘llarini izlamoqda.
Jumladan, «Geran-5»ni Su-25 samolyotidan uchirish va uni «havo-havo» raketalari bilan jihozlash masalalari ko‘rib chiqilmoqda. Bu usullar dronning parvoz masofasini uzaytirishi va xarajatlarni kamaytirishi mumkin.
Xalqaro ekspertlar Rossiyaning arzon dronlar yordamida Ukraina Havo mudofaa tizimlarini charchatish strategiyasini davom ettirayotganini ta’kidlamoqda. «Geran-2» droni taxminan 60 ming dollar tursa, yangi modellar yanada arzonroqqa tushadi.
Bu esa Ukrainani qimmatbaho zenit raketalarini arzon dronlarga qarshi sarflashga majbur qilish maqsadida amalga oshirilmoqda. Hozirda Ukraina razvedkasi qo‘lga kiritilgan dron namunalarini o‘rganmoqda.
Dronning texnik tuzilishi va imkoniyatlari bo‘yicha batafsil hisobot tez orada taqdim etilishi kutilmoqda. Yangi dronlarning paydo bo‘lishi Ukraina Havo mudofaa tizimi uchun jiddiy sinov bo‘lishi aniq.
