Qozog‘istonda dipfeyk va soxta obunachilar taqiqlandi
Qozog‘iston musulmonlari diniy boshqarmasi ijtimoiy tarmoqlarda dipfeyk texnologiyasidan foydalanish va obunachilar sonini sun’iy oshirishni taqiqlovchi fatvo qabul qildi. Bu haqda Zamin.uz xabar berdi.
Ushbu qaror Ulamolar kengashi tomonidan tasdiqlangan bo‘lib, bu haqda rasmiy xabar berildi. Fatvoda dipfeyk texnologiyasi yordamida yolg‘on axborot tarqatish aldov hisoblanishi va islom huquqi me’yorlariga zid ekani qayd etilgan.
Shuningdek, musulmonlarga soxta yoki bot-akkauntlar orqali kuzatuvchilar sonini sun’iy ko‘paytirish, buning uchun xizmatlarga pul to‘lash qat’iyan man etilgan. Diniy boshqarma bunday amallar jamiyatda chalg‘itishga sabab bo‘lishini va Qur’on hamda Payg‘ambar Muhammad (s.a.v.) sunnatida belgilangan halollik tamoyillariga zarar yetkazishini ta’kidladi.
Fatvolar tavsiyaviy xarakterga ega bo‘lib, musulmonlar va ularning jamoalari uchun yo‘riqnoma sifatida qabul qilinadi. Mazkur qarorlar haqida batafsil ma’lumot Qozog‘iston musulmonlari diniy boshqarmasining rasmiy saytida e’lon qilingan.
Dipfeyk texnologiyasi esa sun’iy intellekt yordamida yaratiladigan, real ko‘rinadigan tasvir va videolarni anglatadi.
