Atlantikada 10 tonna kokain musodara qilindi
12-yanvar kuni Ispaniya politsiyasi va dengiz kuchlari Atlantika okeanida katta miqyosdagi operatsiyani amalga oshirdi. Bu haqda Zamin.uz xabar berdi.
Ushbu operatsiya davomida Kamerun bayrog‘i ostida suzgan yuk kemasidan qariyb 10 tonna kokain musodara qilindi. Ushbu giyohvand modda tuz yuki orasiga juda puxta yashirilgan bo‘lib, 294 ta qop shaklida joylashtirilgani ma’lum bo‘ldi.
Tergovchilar kemaning Braziliyadan chiqqanini va yuk Yevropaga olib ketilayotganini aniqlashdi. Operatsiya yakunida kema yoqilg‘isiz qolib, deyarli 12 soat davomida dengizda harakatsiz turgan.
Shundan so‘ng Ispaniyaning qutqaruv xizmati kemani Kanar orollaridagi Santa-Krus-de-Tenerife portiga olib bordi. Politsiya bu ish ortida Janubiy Amerikadan Yevropaga kokain yetkazib beruvchi yirik xalqaro jinoiy guruh turganini ma’lum qildi.
Operatsiya davomida xodimlar tuz yuki orasidan kokain qoplarini chiqarib olishgan. Topilgan giyohvand moddaning umumiy qiymati 400 million yevro atrofida baholanmoqda.
Shuningdek, kema bortidan o‘qotar qurol topilgan, ekipajning 13 nafar a’zosi hibsga olingan. Ushbu operatsiya “Oq to‘lqin” deb nomlangan bo‘lib, unda Ispaniya politsiyasi bilan birga AQSHning Narkotik moddalar nazorati boshqarmasi (DEA), Buyuk Britaniyaning Milliy jinoyatlar agentligi (NCA), Braziliya Federal politsiyasi va boshqa xalqaro tashkilotlar ishtirok etgan.
Ispaniya hukumati ushbu operatsiyani xalqaro narkotik savdosiga qarshi tarixiy zarba sifatida baholadi. Shuni ham ta’kidlash kerakki, Ispaniya Lotin Amerikasi bilan yaqin aloqalari sababli Yevropaga narkotik moddalar kirib kelishida asosiy yo‘laklardan biri hisoblanadi.
Masalan, 2024-yilda mamlakatda Ekvadordan kelgan konteyner kemasidan 13 tonna kokain musodara qilingani qayd etilgan.
