AQSh Kongressiga Grenlandiyani sotib olish taklifi kiritildi

Respublikachi kongressmen Rendi Fayn AQSh Kongressiga Grenlandiyani AQSh tarkibiga qo‘shish va unga shtat maqomini berish bo‘yicha qonun loyihasini taqdim etdi. Bu haqda Zamin.uz xabar berdi.

U o‘z bayonotida bu tashabbus Grenlandiyani anneksiya qilish yoki sotib olish imkoniyatlarini huquqiy muhokama maydoniga olib chiqishga qaratilganini ta’kidladi. Faynning aytishicha, Arktikadagi geosiyosiy vaziyat tobora keskinlashmoqda.

Rossiya va Xitoy mintaqadagi faoliyatini kengaytirayotgani Vashingtonning xavfsizlik va strategik manfaatlariga jiddiy bosim o‘tkazmoqda. Kongressmenning fikricha, Grenlandiyaga egalik qilish Arktika dengiz yo‘llarini nazorat qilish imkoniyatini beradi.

Bundan tashqari, AQSh xavfsizligi uchun muhim bo‘lgan tizimlar ham ushbu hudud bilan bog‘liq. Faynning ta’kidlashicha, AQSh bu kabi strategik hududni xavfsizlikka tahdid soluvchi rejimlar ixtiyoriga qoldirmasligi zarur.

Uning fikricha, qonun loyihasi aynan shu tahdidlarni kamaytirishga xizmat qiladi. Agar ushbu qonun qabul qilinsa, AQSh prezidenti Grenlandiyani anneksiya qilish yoki sotib olish uchun zarur choralarni ko‘rish vakolatiga ega bo‘ladi.

Shuningdek, prezident bu jarayon bo‘yicha Kongressga hisobot taqdim etishi talab qilinadi. Grenlandiyaning umumiy maydoni 2 166 000 kvadrat kilometrni tashkil qiladi.

Agar u AQShning 51-shtatiga aylansa, mamlakatdagi eng katta shtat bo‘lib, hozirgi eng yirik shtat Alyaskadan ham katta bo‘ladi. Alyaskaning maydoni esa 1 723 000 kvadrat kilometrni tashkil etadi.

Eslatib o‘tamiz, Grenlandiya Daniya qirolligi tarkibiga kiradi. 1953 yilgacha u Daniyaning mustamlakasi bo‘lgan.

2009 yilda esa kengroq muxtoriyat maqomini olib, ichki siyosatni mustaqil boshqarish huquqini qo‘lga kiritgan.