Pxuketdagi kater halokati: uch o‘zbekistonlik jarohatlandi
O‘zbekiston Tashqi ishlar vazirligi Tailandning Pxuket orolida ro‘y bergan kater halokati yuzasidan rasmiy ma’lumot berdi. Bu haqda Zamin.uz xabar berdi.
Ushbu voqea 11-yanvar kuni sodir bo‘lgan. Tezyurar kater Pxuketdan Pxi-Pxi oroliga yo‘l olganida baliqchilar kemasi bilan to‘qnashgan.
Kater bortida O‘zbekiston, Rossiya, Qozog‘iston va Qirg‘izistondan kelgan sayyohlar bo‘lgan. Ma’lumotlarga ko‘ra, katerda O‘zbekistonning uch nafar fuqarosi bo‘lgan.
To‘qnashuv natijasida ikki nafar o‘zbekistonlik yengil tan jarohati olgan va mahalliy shifoxonaga yotqizilgan. Keyinchalik ular to‘liq sog‘ayib, shifoxonadan chiqarilgan.
Tibbiy va boshqa zarur xarajatlar katerga egalik qiluvchi kompaniya sug‘urtasi hisobidan to‘liq qoplangan. O‘zbekistonning Bangkokdagi Bosh konsulxonasi voqea yuzasidan mahalliy huquqni muhofaza qiluvchi idoralar va tibbiy muassasalar bilan doimiy aloqada bo‘lgan.
Rasmiy axborotga ko‘ra, barcha zarur yordam o‘z vaqtida ko‘rsatilgan. Shuningdek, Rossiyaning Pxuketdagi bosh konsulligi ushbu hodisa oqibatida Rossiyaning 18 yoshli fuqarosi halok bo‘lgani va yana 23 nafar rossiyalik turli darajada jarohatlanganini ma’lum qilgan.
Mazkur hodisa jiddiy bo‘lsa-da, O‘zbekiston fuqarolari zarur yordamni o‘z vaqtida olgani va sog‘ayib chiqqani tasdiqlangan.
