Trampning agressiv siyosati xalqaro xavotir uyg‘otmoqda
AQSh Prezidenti Donald Tramp so‘nggi paytlarda xalqaro maydonda kuch ishlatishga asoslangan keskin qarorlar qabul qilmoqda. Bu haqda Zamin.uz xabar berdi.
Jumladan, u Venesuela rahbariyatini hokimiyatdan chetlatish va mamlakatning neft zaxiralarini nazorat qilishga harakat qilayotgani haqida ma’lumotlar tarqaldi. Shuningdek, Tramp Grenlandiyani qo‘shib olish va Eronni harbiy tahdidlar bilan siquvga olish haqidagi bayonotlari bilan ham e’tiborni tortmoqda.
Uning bu kabi harakatlari nafaqat raqib, balki do‘st davlatlarda ham xavotir uyg‘otmoqda. Ko‘pchilik Trampning keyingi qadamlarini oldindan bashorat qila olmayapti.
Mutaxassislar esa bu siyosat xalqaro barqarorlikka salbiy ta’sir ko‘rsatishi, davlatlar o‘rtasida noaniqliklarni keltirib chiqarishi mumkinligini ta’kidlamoqda. Lotin Amerikasi va Osiyo davlatlari Trampning bunday siyosatidan xavotir bildirmoqda.
Masalan, Yaponiya va Janubiy Koreya rasmiylari Venesuelaga aralashuvni kuch ishlatish siyosatining namunasi sifatida baholamoqda. Shu bilan birga, ayrim tahlilchilar Trampning siyosati Xitoy va Rossiyaga o‘z manfaatlarini kengaytirish imkoniyatini taqdim etishi mumkinligidan ogohlantirmoqda.
Bundan tashqari, Tramp Eron ichki ishlariga aralashish tahdidi bilan namoyishlarni qo‘llab-quvvatlashini bildirgan. Bu esa Yaqin Sharqdagi vaziyatni yanada murakkablashtirishi mumkin.
Tahlilchilar AQShning bunday siyosati xalqaro qonun va kelishuvlarga zid bo‘lishi ehtimoli yuqori ekanini qayd etmoqda.
