AQSh vakili va Rizo Pahlaviy maxfiy uchrashdi

AQSh prezidenti maxsus vakili Stiven Uitkoff va Eronning 1979 yilda taxtdan ag‘darilgan shohi Muhammad Rizo Pahlaviyning o‘g‘li, shahzoda Rizo Pahlaviy o‘rtasida maxfiy uchrashuv bo‘lgani haqida Axios nashri xabar berdi. Bu haqda Zamin.uz xabar berdi.

Ushbu uchrashuv tafsilotlari ochiqlanmagan bo‘lsa-da, manbalarning ma’lum qilishicha, ular Erondagi aksilhukumat namoyishlarini muhokama qilishgan. Hozirda AQShda yashayotgan 65 yoshli Rizo Pahlaviy Erondagi norozilik harakatlarini qo‘llab-quvvatlamoqda.

U 11 yanvar kuni Fox News telekanaliga bergan intervyusida o‘zini Eronga qaytishga tayyor ekanini bildirib, Islom Respublikasini ag‘darish uchun qat’iy choralar zarurligini ta’kidladi. Pahlaviyning fikricha, u hali ham Erondagi siyosiy jarayonlarda muhim shaxs sifatida o‘z o‘rnini saqlab qolgan.

Biroq, Axios nashrining yozishicha, AQSh hukumati Rizo Pahlaviyni muhim siyosiy o‘yinchi sifatida ko‘rmaydi. Shunga qaramay, Erondagi norozilik harakati ishtirokchilarining bir qismi uni qo‘llab-quvvatlashi Tramp ma’muriyati vakillarini hayratga solgan.

Uitkoff bilan uchrashuv shuni ko‘rsatadiki, AQSh hukumati Pahlaviyning ehtimoliy siyosiy rolini qayta ko‘rib chiqishi mumkin. Erondagi ommaviy norozilik namoyishlari 2025 yil 28 dekabr kuni Tehron bozorlarida boshlangan.

Bu harakat savdogarlarning giperinflyatsiya va narxlarning keskin o‘sishiga qarshi do‘konlarini yopishi bilan boshlangan. Tez orada namoyishlar butun mamlakat bo‘ylab tarqalib, siyosiy harakatga aylangan.

Inson huquqlari tashkilotlari va G‘arb matbuoti xabarlariga ko‘ra, namoyishlar davomida yuzlab inson halok bo‘lgan. AQSh prezidenti Donald Tramp Erondagi vaziyatga nisbatan ogohlantirish berib, AQShning Eronga nisbatan yanada qat’iy harbiy choralar ko‘rishi mumkinligini ta’kidladi.

Shuningdek, AQSh Eron Islom Respublikasi bilan biznes yuritayotgan davlatlarga 25 foizlik boj joriy etdi. AQShning Erondagi diplomatik vakolatxonasi esa o‘z fuqarolarini mamlakatni tark etishga chaqirib, vaziyatning yanada murakkablashishi mumkinligi haqida ogohlantirdi.