Janubiy Koreya sobiq prezidenti uchun o‘lim jazosi talab qilindi
Janubiy Koreya prokuraturasi mamlakatning sobiq prezidenti Yun Sok Yolga nisbatan o‘lim jazosi tayinlashni talab qildi. Bu haqda Zamin.uz xabar berdi.
U noqonuniy ravishda harbiy holat joriy etish, tartibsizliklar tashkil qilish va Konstitutsiyaga zarar yetkazishda ayblanmoqda. Bu haqda ommaviy axborot vositalari xabar bermoqda.
Ma’lum qilinishicha, 2024-yil dekabr oyida Yun Sok Yol mamlakatda harbiy holat e’lon qilgan. U bu qarorni "konstitutsiyaviy tartibni himoya qilish" va "Shimoliy Koreyadan kelayotgan tahdid" bilan izohlagan.
Biroq, muxolifatdagi Demokratik partiya yetakchisi Li Je Men va parlament tomonidan bu qaror bekor qilingan. Shundan so‘ng, sobiq prezidentning faoliyati yuzasidan tekshiruv ishlari boshlangan.
Yonhap axborot agentligi bergan ma’lumotga ko‘ra, Yun Sok Yol Milliy assambleya binosini qurshab olish uchun harbiylar va politsiyani jalb qilgan. Bundan tashqari, u parlamentda o‘z farmoniga qarshi ovoz berilishiga to‘sqinlik qilgan hamda parlament spikeri va partiyalar yetakchilarini hibsga olish bo‘yicha buyruqlar bergan.
Shuningdek, sobiq prezidentning turmush o‘rtog‘i Kim Kon Hi ham hibsga olingan. U aksiyalar bilan bog‘liq manipulyatsiyalar, pora olish va saylov jarayoniga aralashishda ayblanmoqda.
Hozirda ushbu ish yuzasidan tergov ishlari davom etmoqda.
