Eron namoyishlarida ikki mingga yaqin odam halok bo‘ldi

Eron rasmiylarining ma’lum qilishicha, mamlakatda so‘nggi ikki hafta davomida bo‘lib o‘tgan norozilik namoyishlari vaqtida qariyb ikki ming kishi halok bo‘lgan. Bu haqda Zamin.uz xabar berdi.

Ushbu ma’lumotni Reuters agentligiga ismi oshkor etilmagan mansabdor shaxs bergan. Noroziliklar davomida halok bo‘lganlar orasida namoyishchilar va xavfsizlik xodimlari borligi ta’kidlanmoqda.

Shu bilan birga, Eron tashqarisidagi muxolif guruhlar qurbonlar soni bundan ham ko‘proq ekanini iddao qilmoqda. Eron rasmiylari norozilik namoyishlari ortida “terrorchi guruhlar” borligini va ularning harakatlari tashqi kuchlar tomonidan boshqarilayotganini bildirmoqda.

Mamlakat rahbariyati tartibsizliklarni kuchaytirishda AQSh va Isroilni ayblamoqda. Bu noroziliklar og‘ir iqtisodiy vaziyat sabab yuzaga kelgani aytilmoqda.

Tahlilchilarga ko‘ra, so‘nggi yillarda Eron bir necha marta yirik namoyishlarni boshdan kechirgan, ammo bu safargi voqealar mamlakatdagi iqtisodiy va siyosiy zaiflik fonida o‘tmoqda. AQSh prezidenti Donald Tramp avvalroq Eron bilan savdo qiladigan davlatlarga nisbatan 25 foizlik boj joriy etilishini e’lon qilgan edi.

Tehron bu bayonotga javob bermagan, lekin Xitoy uni tanqid qilgan. Eron neftining asosiy xaridorlari Xitoy, Turkiya, Iroq, BAA va Hindiston hisoblanadi.

Shu bilan birga, Germaniya kansleri Fridrix Merts Eron hukumatining ag‘darilishi ehtimoli haqida gapirib, mamlakat rahbariyatining kunlari sanoqli ekanini ta’kidlagan. Biroq Eron tashqi ishlar vaziri bu fikrlarni rad etib, Germaniyani ikkiyuzlamachilikda ayblagan.

Namoyishlar davom etayotgan bo‘lsa-da, Eron kuch tuzilmalarida jiddiy bo‘linishlar kuzatilmayapti. Rasmiylar iqtisodiy noroziliklarni qonuniy deb tan olgan, ammo xavfsizlik choralarini kuchaytirishni davom ettirmoqda.

Shu bilan birga, mamlakatda internet aloqasi cheklangani sababli ishonchli ma’lumot olish qiyinlashgan. BMT ma’lumotiga ko‘ra, telefon aloqasi tiklangan, ammo internet hanuz beqarorligicha qolmoqda.