Eron Rossiyaga milliardlab dollarlik qurol yetkazgan
Bloomberg axborot agentligi 12-yanvar kuni g‘arb ekspertlariga asoslanib, Eron Rossiyaga qariyb 3 milliard dollarlik raketa va boshqa harbiy texnika yetkazib berganini xabar qildi. Bu haqda Zamin.uz xabar berdi.
Ma’lumotlarga ko‘ra, bu kelishuvlar 2021-yil oktyabr oyidan, ya’ni Rossiyaning Ukrainaga keng miqyosdagi hujumi boshlanishidan oldin amalga oshirilgan. Ekspertlar hisob-kitobiga ko‘ra, shartnomalar umumiy qiymati 2,7 milliard dollarni tashkil etgan.
Manbalarning ma’lum qilishicha, Rossiya ushbu shartnomalar doirasida Fath-360 turidagi qisqa masofali yuzlab ballistik raketalar, taxminan 500 ta boshqa qisqa masofali raketalar hamda havo mudofaa tizimlari uchun 200 ga yaqin zenit raketalarini xarid qilgan. Rossiya va Eron o‘rtasidagi harbiy hamkorlik 2022-yil fevral oyida, Rossiya Ukrainaga hujum boshlaganidan keyin kuchaygan.
Mazkur urush Rossiyaga qarshi keng qamrovli sanksiyalarni keltirib chiqardi va bu jarayon G‘arb va Rossiya aloqalarining Sovuq urushdan keyingi eng jiddiy inqiroziga aylandi. G‘arb ekspertlarining ta’kidlashicha, aynan Eronning harbiy mahsulotlari ikki davlat o‘rtasidagi aloqalarni yanada mustahkamlagan.
Bundan tashqari, Eron Rossiyaga millionlab patronlar va artilleriya snaryadlari yetkazib bergan. Bu raqamlar barcha xaridlarni qamrab olmasligi va kelgusida yangi yetkazib berishlar amalga oshirilishi mumkinligi ham ta’kidlanmoqda.
Shuningdek, Tehron Rossiyaga Shahed-136 uchuvchisiz zarba beruvchi qurilmalarni va ularni mahalliy sharoitda ishlab chiqarish texnologiyalarini ham taqdim etgan. Ushbu hamkorlik 2023-yil boshida imzolangan 1,75 milliard dollarlik shartnoma asosida amalga oshirilgan.
Ekspertlarning hisob-kitobiga ko‘ra, Rossiya 2021-yildan buyon Eron harbiy texnikasini xarid qilish uchun 4 milliard dollardan ortiq mablag‘ sarflagan. Moskva va Tehron o‘rtasidagi yaqinlik 2010-yillarda, Eron yadroviy dasturi va unga nisbatan G‘arb sanksiyalari bosimi kuchaygan davrda shakllangan.
2025-yilning yanvar oyida ikki davlat strategik sheriklik to‘g‘risida kelishuv imzolagan, ammo unda harbiy majburiyatlar nazarda tutilmagan. Shu bilan birga, manbalarga ko‘ra, Rossiya o‘tgan yili Isroil va AQSH zarbalari paytida Eronga sezilarli yordam bermagan.
Hozirda Moskva va Tehron Eron orqali Hindistonga savdo yo‘lagini rivojlantirish va sanksiyalar ta’sirini kamaytirish maqsadida moliyaviy hamkorlikni kengaytirish rejasini muhokama qilmoqda. Bloomberg so‘rovlariga ko‘ra, Rossiya Mudofaa vazirligi va Eron Tashqi ishlar vazirligi bu borada rasmiy izoh bermagan.
