Qozog‘istonda alkogol savdosiga qat’iy cheklovlar taklif qilindi

Qozog‘istonda alkogol mahsulotlari iste’molini cheklash va spirtli ichimliklar savdosini nazorat qilish masalasi muhokama qilinmoqda. Bu haqda Zamin.uz xabar berdi.

Majlis deputati Magerram Magerramovning so‘zlariga ko‘ra, spirtli ichimliklar jinoyatchilikning asosiy sabablaridan biri bo‘lib, inson salohiyatini yo‘qotishga olib kelmoqda. Tengrinews.kz xabariga ko‘ra, Ichki ishlar vazirligi ma’lumotlari jinoyatlarning ko‘p qismi mast holatda sodir etilishini ko‘rsatadi.

Har ikkinchi qotillik, har uchinchi zo‘rlash va bezorilik, har to‘rtinchi talonchilik aynan spirtli ichimlik iste’moli bilan bog‘liq. Bundan tashqari, yo‘l-transport hodisalari va oilaviy zo‘ravonlik holatlarining yarmidan ko‘pi ham mastlik oqibatida yuz berayotgani qayd etilgan.

Deputat voyaga yetmaganlarga oid jinoyatlar soni ortayotganini ta’kidlab, chakana savdo nuqtalarining ko‘pligi nazoratni qiyinlashtirayotganini aytgan. Shu sabab Qozog‘iston Xalq partiyasi fraksiyasi alkogol savdosiga oid qat’iy chora-tadbirlarni joriy qilishni taklif etmoqda.

Jumladan, bolalar bog‘chalari va ta’lim muassasalaridan 100 metr masofada spirtli ichimlik sotishni taqiqlash, savdo nuqtalari sonini kamaytirish, alkogol mahsulotlarini majburiy raqamli yorliqlash va onlayn savdoni to‘liq taqiqlash rejalashtirilgan. Shuningdek, alkogol faqat maxsus belgilangan joylarda sotilishi, chakana savdo 20:00 dan keyin, kafe va restoranlarda esa 22:00 dan keyin to‘xtatilishi taklif qilinmoqda.

Qayd etilishicha, hozirda Qozog‘istonda 429 ta qishloq alkogoldan butunlay voz kechgan. Masalan, Aqtobe viloyatida 33 ta, Qizilo‘rda viloyatida 18 ta, Atyrau viloyatida esa 53 ta qishloqda spirtli ichimlik savdosi taqiqlangan.

Ushbu hududlarda so‘nggi ikki yilda birorta ham huquqbuzarlik qayd etilmagani sabab, bunday tajribani boshqa joylarga ham kengaytirish rejalashtirilmoqda.