Grenlandiya: Daniya va AQSh o‘rtasida keskinlik kuchaymoqda

AQSh prezidenti Donald Trampning Grenlandiyaga bo‘lgan qiziqishi ortidan Daniya va Yevropa mamlakatlari xavfsizlikni ta’minlash maqsadida orolga kichik harbiy guruhlar yuborishni boshladi. Bu haqda Zamin.uz xabar berdi.

Tramp Grenlandiyani strategik ahamiyatga ega va minerallarga boy hudud sifatida ko‘rib, uni AQSh nazoratida bo‘lishi kerakligini ta’kidlamoqda. U bu orqali orolni Rossiya yoki Xitoy ta’siridan himoya qilishni maqsad qilgan.

Daniya bosh vaziri Mette Frederiksenning so‘zlariga ko‘ra, Daniya Grenlandiyaning AQSh tomonidan egallanmasligi uchun barcha choralarni ko‘rmoqda. Daniya va Grenlandiya vakillari AQSh bilan muzokaralar o‘tkazib, yuzaga kelgan nizoni tez fursatda hal qilishga intilmoqda.

Bu orada Germaniya, Fransiya, Shvetsiya va Norvegiya kabi davlatlar ham Grenlandiyaga o‘z harbiy xodimlarini yuborib, ittifoqchilar bilan birgalikda mashg‘ulotlar o‘tkazishni rejalashtirmoqda. Daniya mudofaa vazirligiga ko‘ra, bunday harakatlar ikki asosiy maqsadga xizmat qiladi: birinchidan, Grenlandiyani himoya qilishga tayyor ekanliklarini namoyish etish, ikkinchidan esa, orolning suverenitetini himoya qilishni ta’minlash.

Grenlandiya bosh vaziri Jens-Frederik Nielsen orolning AQSh nazorati ostiga o‘tmasligini va Daniya hamda NATO tarkibida qolishini tasdiqladi. Shu bilan birga, Daniya va Grenlandiya vakillari AQSh bilan ishchi guruh tuzib, Grenlandiya xavfsizligini muhokama qilishni rejalashtirgan.

NATO va Yevropa davlatlari ham Grenlandiyaning suverenitetini qo‘llab-quvvatlamoqda.