Tabrizda harbiy holat va komendantlik soati joriy etildi
Eronning Tabriz shahrida harbiy holat e’lon qilindi va komendantlik soati joriy etildi. Bu haqda Zamin.uz xabar berdi.
Rasmiy ma’lumotlarga ko‘ra, endilikda shaharda soat 20:00 dan keyin ko‘chaga chiqish qat’iyan taqiqlangan. Bu chora-tadbirlar mamlakatda yuzaga kelgan norozilik namoyishlari va iqtisodiy inqiroz fonida qabul qilingan.
Xabarlarga ko‘ra, Tabrizdagi Katta bozor va asosiy oziq-ovqat do‘konlari faoliyati to‘xtatilgan. Ayrim kichik savdo shoxobchalari belgilangan vaqtlarda ishlayotgan bo‘lsa-da, aholining zaruriy ehtiyojlarini qondirish imkoniyati sezilarli darajada cheklangan.
Mamlakatda milliy valyuta — rialning keskin qadrsizlanishi natijasida norozilik namoyishlari avj olgani aytilmoqda. Bu holat hukumat tomonidan xavfsizlik choralari kuchaytirilishiga olib kelgan.
Namoyishlarni bostirish maqsadida xavfsizlik kuchlari tomonidan o‘qotar qurollar qo‘llanilgani to‘g‘risida ham ma’lumotlar bor. Shuningdek, AQSH tomonidan ehtimoliy havo hujumlari xavfi ham shahardagi cheklovlarni kuchaytirishga sabab bo‘lgan omillardan biri sifatida ko‘rilmoqda.
Shu sababli, Tabriz shahrida qat’iy tartib-intizom o‘rnatilib, aholiga belgilangan qoidalarga rioya qilish talabi qo‘yilgan.
