103 yoshli ayol “vafotidan” so‘ng tirildi
Hindistonning Maxarashtra shtati, Nagpur viloyatidagi Ramtek hududida 103 yoshli Gangabay Saxare ismli ayolning tirikligi kutilmaganda aniqlanib, bu voqea mahalliy aholida katta hayrat uyg‘otdi. Bu haqda Zamin.uz xabar berdi.
Ayolning qarindoshlari uni harakatsiz va nafas olmayotgan holatda ko‘rib, vafot etgan deb o‘ylashgan. Shundan so‘ng, an’anaga muvofiq uni oq libosga o‘rab, burniga paxta qo‘yishgan va dafn marosimiga tayyorgarlik ko‘rishni boshlashgan.
Biroq, oxirgi tayyorgarlik jarayonida yaqinlaridan biri ayolning oyoq barmoqlari qimirlaganini payqab qolgan. Shundan so‘ng, uning burnidan paxta olib tashlanganida, ayol chuqur nafas olgan.
Bu holat yig‘ilganlarning barchasini hayratga solib, motam kayfiyatini quvonchga aylantirgan. Qiziqarli tomoni shundaki, bu voqea aynan ayolning tug‘ilgan kuniga to‘g‘ri kelgan.
Hozirda Gangabay Saxare mahalliy aholining e’tibor markazida bo‘lib, uni “tirik mo‘jiza” deb atashmoqda. Qo‘shni qishloqlardan ham uni ko‘rish uchun kelayotganlar ko‘pligi aytilmoqda.
Bu voqea ko‘pchilikni hayratga solgan va hududda katta shov-shuvga sabab bo‘lgan.
